ГIибратли виэси
ГIибратли виэси
Ишди бурхIназиб Хасавюртлизиб бетерхурси лебил Россияла 19 ибил жагьилти гIялимтала ва хIяфизунала Саидбег Даитовла уличилси конкурсличив дарган багьадур - ГIяхIмад ГIисахIяжиевли чедибдеш сархиб.
Нушала иш белкIла игит ГIяхIмад ГIисахIяжиев акIубси сай Лавашала районна ЧебяхI Убекила шилизив. Илини МяхIячкъалализибси шайх МяхIяммад-Арифла уличилси Дагъистанна Исламский университет сархибдешуначил таманбарибси сай.
ГьанбуршехIе, гьар дус илгъуна конкурс дурабуркIнила мурад - жагьилтас ислам динна бархьси багьуди ва бяркъ бедес ва белчIудиличи иштяхI акIахъес. Балбуцличиб саламтала дугьбачил Дагъистанна муфтий шайх ГIяхIмад-Апандила шайзивад гъайухъунси илала заместитель МяхIяммад Мангуевли цалабикибти мубаракбариб ва сиптакартас баркалла багьахъур.
Илдигъунти бусурманти цабиънила далдуцуни гьаман дурадуркIни гIяхIсилизи халбариб.
«Конкурс кIел бутIаличил бетерхурсири, цаибилличир 48 суайс жаваб делкIес хIяжатлири, гIергъиси бутIализи дурабухъес багьандан. Илдазибад 7 адам финаллизи дурабухъун», - бурули сай ГIяхIмадли.
ГIяхмадлис ил конкурс сагадеш ахIен. Илини гьаларра бутIакьяндеш дарибтири. Арбякьунси дуслизиб биалли, 4 - ибил мер сархибсири.
Нуни ГIяхIмадличил камси ихтилат дураберкIили, конкурсличила бурахъес тиладибарира.
«Конкурсла номинацияби сарри: «ДехIибала», «ХIифз», «ГIилму». Улкала мадрасабала ва чебяхIси даражала багьудила заведениебала бучIантас 25 дусличи бикайчи ихтияр лебси саби ил конкурслизир бутIакьяндеш дарес. Лебилра бучIанти 250 -цад лебри. Нуни «ГIилму» номинациялизир сарри бутIакьяндеш дарибти. Гьайгьайрагу, гьамадли ахIенри. Гьаларти дусми халхIедарили, ну гIергъити 3-4 баз ибкьли хIядурикIусири. Лебтазибадалра ахирласи бутIализи 7 адам дурабухъун. Илдас гIягIнисири саби урус мезла белкI гIяраб мезличи шурбатес, гIяраб мезла белкI биалли, урус мезличи шурбатес. ГIур вегIлис дигуси тема декIарбарили, 10 минутла бухIнаб вягIза хIядурбарес чебси саби. Жюрила гьалаб ил вягIза бируси саби гIяраб мезличил. Цаибил бутIа дураберкIибхIели дилара абзлизивси къаршикарлара ургаб 1,5 балла декIардеш лебри. КIиибил бутIализив ну иличив 0,46 балла декIардешличил гьалаикира».
Конкурсла баянтира гьаладирхьехIе:
«ДехIибала» номинациялизиб 1 - ибил мер сархиб МяхIяммад Шихалиевли, илис Кьуръан ва 2000 доллар савгъатдариб;
2 - ибил мер - МяхIяммад Алижановли, илис 1,500 доллар дедиб;
3 - ибил мер - Аюб Нуралиевли, илис 1000 доллар дедиб.
«ХIифз» номинациялизиб чедибикибти:
1 - ибил мер - МяхIяммад МяхIяммадов, илис Кьуръан ва «Лада Гранта» автомобиль дедиб;
2 - ибил мер - МяхIяммад Солтаев, илис ноутбук ва 2000 доллар дедиб;
3 - ибил мер - Амир МяхIяммадов, илис 1000 доллар савгъатдариб.
«ГIилму» номинациялизиб чедибикибти:
1 - ибил мер - ГIяхIмад ГIисахIяжиев, илис Кьуръан ва Volrswagen Polo автомобиль савгъатдариб;
2 - ибил мер - Шамил Багатаров, илис ноутбук ва 3000 доллар дедиб;
3 - ибил мер - МяхIяммад Сайпудинов, илис ноутбук ва 2000 доллар пешкешдариб.
Ишаб бурес чебиркур, конкурслизир бутIакьяндеш дарибти шайх МяхIяммад-Арифла уличилси Дагъистанна Исламла университетла бучIантас хIяжлизи путевкабира дедибти сари.
Марлира, адамла кьисмат тамашала секIал саби. Адамли ца секIал пикрибирули саби, Кьудратла ВегIли биалли, ургIерли, цархIил тяхIярли гьунчидуршули сари. ХIера, ГIяхIмадра виштIаси дурхIяли вирухIели, футболист ветаэс пикриикIусири, илхIели ил 14 дусцун сайри виубси. Амма мадрасализи керхурли гIергъи, илала пикруми лутIи-хьулчилизирадал дарсдиуб. Гьанна ил динна гIилмулизи мурхьикибси пагьмучевси адам сай. Гьайгьайрагу, гьариллис сунела кьамлизив илгъуна динна гIялим виубли дигахъу.
- ГIяхIмад, хIу челябкьлализив чинав узес, се барес пикри леба?
- БусягIятла замана ну аспирантурализи керхес хIядурикIулра. Илабси белчIуди таманбиубхIели, динна хIянчизарти хIяжатти мерличи бурхьути саби, сенкIун кIел дусла бухIнаб практика дураберкIес хъарси саби. Аспирантурализив учIулира узес вируси сай .
- ХIуни жагьилтас сегъуна насихIят бурида?
- ИшбархIи багьуди кайснила жураби дахъал сари, дигалли Интернет сайтаначирад, дигалли видео блогертачирад. Иличил бархбасахъи бурес дигулра, дугIли замана хIеберкIили, багьудлуми касес багьандан белчIудила заведениебази жагьилти кабурхахъес. Илабцун вирар бархьси дин бяркъес. Суалти алкIули диалли, мерличибти имамтачи дугьадилзеная. Нушала республикализиб мурхьти гIилму дяркъурти бахъал гIялимти лебти саби, илдала гьунчирад дашеная. Нушачибси умуси дин хьулчилизибадал багьес къайгъибарая, гIяхIси гIибратцун касили. Нушала Идбагла ﷺ бархьси гьунчирад чермадулкIудая. ХIязлис ахIенгу нушачи бакIибти дурала улкаланти хIушачиб умуси дин леб бикIути. Ил бархьсира саби, бучIес дигутас лерил шуртIрира лер. Ишдигъунти конкурсуни илис бикьрира сари.
Баркалла, ГIяхIмад. ХIела уркIила мурадуни дааб, пикридарибти детерхаб, ЧевяхIсини мурталра гIевурцаби. Аллагь ﷻ хIечи разивиаб. Амин!
