Бурдекила шилизибси хала мижитличила
Ишаб наб сунечила бурес дигуси «Аллагьла хъали» – хабардерхурси, дунъяличиб сабигъуна гIур чинабалра агарси, ца галгализибад барибси мижитличила саби. Ил чебаэс ибси пикриличил, гIярабла пачалихъуназибад булан нушачи бакIибти биуб, алавти шимазибад башутира леб. Ил мижит мурт белшунсил балусира агара. Иличила бурдекантачиб цализибад цализи бурули, наслулизибад-наслубачи бикайчи башули калунси хабар саби. Илизиб бурусиличи вирххIеэсра хIейрар, сенкIун мижитла бухлиубси зехнила бухъяндеш 12, 5 метрла саби, илис удяхъили, 3 тIалра лер. Илдачил дарх - хIябал арсаварра. Илдачиб тIашли саби лебилра мижит. Мижитлизир пайдаладарибти, ца галгализирад дакIибти секIал: зехни, тIулри, духьби ва уркьли, лерилра тяп шямван дархьти сари. Илди секIал сунезирад дакIибси сегъуна галга буибсил, ил чинаб бузули буилил балуси агарли виънира, тамашавиэси, вирххIеэси анцIбукьван кавлули саби. Мижит барибси дусличила (ил тарихличила) буруси белкI лебли буили саби, амма сецад хIейгеси биалра, чили сабил зехнилизибси тарихла белкI кьисбарили, убкасили саби.
Шилизиб бурули ишгъуна хабарра кали саби. Мижитла хъалчличи абирхьуси зехни шантани ахъбуцес хIебирули, унра шилизибад бархли кумекличи адамти жибарибтири или. ИлхIелира хIебирули, дубурла дякьличивад лявкьуси ца гьункьяни тIамадарибти сари, бикIар, «нура кумекличи лявкьясрану яхIбарая!». Илдала икьайчиблицун ахъбуцибсири, баягъи сунечила буруси зехни мижитла хъалчличи.
Коммунистунала замана мижит колхозла складличи шурбатурсири. Илар ризкьи калкьули дирутири, Краснопартизансклизибси («Мамайкъутаннизибси») бурдекантала хъарахъла мер-мусаличирад хибти харбузуни, колхозла цархIилти продуктуни, декIар-декIарти гIягIниахълуми мижитлар кадихьили, дихIутири.
СССР бехъубли гIергъи, улкала мер-мусаличиб хIербирути динничи чекабилзес бехIбихьибхIели, нушала шилизивси вахъхIила малла, ЧевяхIсила кьанунти дузахъуси, динничи чекайзурси АсхIяб-аццини складлизирти лерил секIал дурасахъиб, ва ил юрт мижитличи шурбатахъур. Илини мижитлизир дахъал хIянчи дарибтири. Ил лерилра гIямрулизив Аллагьлис улгусири. Ца бархIи бархIехъ мижитлизивад дуравхъи АсхIяб-ацци веткахъиб, ил чина викибал чилилра балули ахIенри. Лебилра шанти шаладикайчи илигIиб умцIули къяйцIбикIутири, варгибси ахIенри. ГIергъила бархIи дуки бякьунтани, Сугурбачи дяхIчити шурмала удив варгибсири. Илди шурмачи дугели ахIенну, хIерелира вархли, жагьил адамра укьес хIейрар. Ил мерличи АсхIябгIяли Аллагьли (с.т.) укилри, сунела вягIда сабаили бурги. Бунагь-хатIа урдуцаб сунела, илгъуналис шагьидла бебкIали алхун или бурули бирар.
МяхIячкъалалализив хIерирули калунси (гIяпабаркь), нушала узикьар МяхIяммад ГIябдуразакьовли Бурдекила шила мижитлар дахъал хIянчи дариб: умудеш ва дазала дирахъес, имцIати палтар дарсдирахъес хъали тIашбатур. Мижитлизи шин ва газ кадукахъиб.
Мижитла хIянчи дарибтасра арцла шайзибад кумекбарибтасра жамигIятли халаси баркалла балахъули саби.
