МухIяммад Идбагла ﷺ суннатуни сегъунти сари?
ХIядислизиб бурули саби: «Чили мицIирбаралра дила сегъуна-биалра суннат, илини шабагъат кайсу, сабира ЧевяхIсила гьунчиб алхунти даршал адамлис бедлугусигъуна».
Ишар нушани цацадехIти суннатуни хIушаб гьаладирхьехIе, сарира гьар бархIи дирес гьамадти.
- ЖамигIятла дехIибайчи кабизуртала кьяшми ца къяйлизир диэс гIягIнити сари;
- Мурталра дазайчил вирес. Бурули саби, Аллагьла Расулли ﷺ дазала дарни гIяхIси саби кайхьес гьалар, айзурхIели, гьар журала балга-дугIя дирухIели, хIяжатханализивад дураулхъунхIели ва хъуливад дураухъес гьалар;
- Супелти кьицIдирес;
- Дазала дарили гIергъи кьиблаличивяхI кайзурли, шин хупIдирес;
- Дазала дарили гIергъи сивакличил кьак умубирес;
- ЖумягI бархIи кьаркьала бирцили, умудеш бирес, ибан тIуйчирад дехIдихьили, никуби кьицIдирес;
- ЖумягI бархIи садакьа буртIес;
- Беркала «Бисмиллягьи рахI-мани ррахIим» или бехIбирхьес, «АльхIамдулиЛлагь» или таманбирес;
- Укес зела ца писличил вехIирхьес;
- Шин дужухIели кайили, хIяб-хIябал хупIличил дужес;
- ДукаркIухIели, ахъли гIяк-гIякхIейкIули, гIяшли дукарвирхIес;
- Адамтачил малхIямли вирес;
- Палтар ва дабри челгьухIели, балуй шайчирад челгьес, алгъай шайчирад чердалтес;
- ХIерила дехIибайс гIергъи камси гьанкI ихъес;
- ГIемчбушибхIели «АльхIамду-лиЛлягь» ирес;
- ВегI левси мер-мусаличиб умудеш бирес;
- Гушвиайчи хIевкули уэс, камси букес. Дебали буцIарси беркала хIебукес;
- Балуй някъли укес;
- Укуси замана се-биалра гIяхIсиличила гъайикIес;
- ВебкIибсила хъули беркала бихес;
- Усес калхьухIели, балуй шайчи калхьес;
- Гьар дуги усаэс гьалар хIяйна сураби делчIес: «Ихлас», «Фалякь», «Нас», хъат нъякъбачи уфбарили, лебил кьаркьала суркбарес. ГIяйшани (р.а.) бурни хIясибли, Аллагьла Расулли ﷺ гьар дуги илкьяйда бирусири;
- Гьар бархIи тавбадирес, «АстагъфируЛлагь» ирес;
- РукугIличи гIяшвиубхIели, къакъ бархьли кабурцес;
- Гьунчивад вашухIели, бекI бара гIяшбуцили вашес;
- Дабри чегьайчи илди пяхIдирес, иларти дибгIян мицIираг дурадухъахъес;
- Чичи-биалра шадив вакIиб-хIели, хIяйна кьутIдяхъес, хъа вегIли пурбанбаралли хъайгIи ацIес;
- ГIяхIти, умути мераначи, балуй кьяшличил айцIес, алгъай кьяшличил дураулхъес;
- Нясти, хIяжатханагъунти мераначи, алгъай кьяшличил ацIили, балуй кьяшличил дураулхъес;
- ЖихI кабалтухIели, тIашли кахIебалтес, жихIла чярхIдухъунти кIунтIри багьандан, хIябла гIязабти имцIадирухIели;
- Гьаман иман сагабирес, сунела асхIябтази Идбагли ﷺ бурусири: «Иман сагабирар «Ла илагьа илла Ллагь» викIалли», или;
- ХIябрачи вашес, бебкIаличила ва бебкIала гIергъити гIямруличила хъумхIертес багьандан;
- КIел бусурман адам къаршибикалли, кIелра някъли цала цали някъби дурцес, салават бучIес;
- АрхIяличи кьукьяличил барх аркьялли, ца адам халал варили чеввикIес;
- МухIяммад Идбагла ﷺ гьунчибад башути бусурманти Аллагьла ﷻ ахъриличил мурталра бархьси гьунчиб бирар.
