Суалти-жавабти

- Дуббуцари се баралли дулъути?

- Балу-балули се-биалра беркалли, яра шин держалли; варглизи се-биалра бухIнабикалли (дарман), къянкъубази яра лихIила бухIна се-биалра букьялли; балу-балули рабчвиалли; мурул-хьуна ургаб гъамдеш биалли; хьунул адам хIилариалли (менструация) яра виштIаси варалли; держ, папрус бержалли; къагъвиалли, дагьрилизивад ухъалли; диннизивад дураухъалли (Аллагьли ﷻ илизибад берцуди бараб).

- Дубуцибсилис асубирару кьаркьайчи кремани, маслаби дикес?

- Дуббуцари илдазирад хIедулъан, амма дебали тIемдикIути креманира маслабира пайдалахIедаралли гIяхIси саби.

- Лезмила уди супIбируси дарман кабихьалли, дуббуцари дулъутив?

- Илала камси-биалра кесек варглизи баалли дулъа, мухIлилаб бацIили таманбиалли, хIедулъа.

- ХIила тумлизи яра гIемслизи укол яра капельница баралли дулъутив дуббуцари?

- АхIен, амма арадешлис чараагардеш лебхIели ахIи, ил барес хIейгесилизи халбируси саби.

- Хургьри изухIели, илди сагъдарес кислород пайдалабарес асубирусив?

- Асубируси саби, сенахIенну кислородла я ранг, я тIем, я гягI агархIели, амма иличил дарх дармунтира даралли, дуббуцари дулъути сари.

- Дуббуцари дулъутив ахтури кьяраалли?

- Балу-балули ахтури кьяраалли, дулъути сари. Илди тударес валкьхIеурли, хабарагарли кьяраалли, дулъути ахIен.

- Асубирусив миск (духи) дуббуцарла базлизир пайдаладарес?

- Бируси саби, амма ил хIебаралли гIяхIсилизи халбируси саби. Илкьяйда илдала тIемличи сунтIхIейкIнира гIяхIси саби, амма ил баралли, дуббуцари дулъути ахIен.

- Цула абитIалли, дуббуцари дулъутив?

- Дулъути ахIен. ХIи яра дарман дархти шутри варглизи даалли, илдани дулъа.

- ЗягIипхIели балу-балули рабч дакIахъалли, дуббуцари дулъутив?

- Дулъути сари, амма илизиб бунагь агара, цархIилван гIяхIдеш хIебирули биалли.

- Дубуцибсилис асубирару хIулбази дарман кIантIдушес?

- Бируси саби, илдала тIем кьаклаб гьанараллира, дуббуцари дулъути ахIен.

- Папрус ва танбаку держалли дулъутив дуббуцари?

- Дулъути сари, сенахIенну папрусла гавличил хургьрази никотинра кабиур.

- Асубирусив хурег бирухIели тIем халбарес, илхIели дулъутив дуббуцари?

- Асубируси саби, амма ил барни хIейгеси саби, сенкIун илхIели се-биалра кьяраалли, дуббуцари дулъан.

- Дуббуцари дулъутив шутри кьяраалли?

- Дулъути ахIен илди умути диалли, шутразир хIи яра берка кесекуни хIедиалли.

- Дуббуцари дулъав сурс-кьакьари изухIели дарман диралли?

- Дарман сурс-кьакьарла (гIярабла хIярп гIайн бетаруси) мерла шайчи бетаили хIебиалли, дулъути ахIен.

- Дубуцибсилис сивак пайдалабарес асубирару?

- Бирар, хIери баайчи, хIери баили гIергъи, хIебаралли гIяхIси саби.

- Дуббуцари дулъутив дазала дирухIели, кьакра къянкъубира даргарухIели, шин кьяраалли?

- Дубуцибсини халаси къайгъиличил кьак баргарухIели шин кьяраалли, дуббуцари дулъути сари. Къянкъуби даргарухIели шин илабси лигала чеди адааллира дулъути сари.