Машрикьла хабурти
Гьарил адам алкIуси сай, гIямру дуркIуси сай ва убкIуси сай. Амма илди гIямру секьяйда дуркIулил ва илдази гьарил адамли кабирхьуси мягIна декIарси саби…
ГIямрула мягIна
Ца мугIяллим сай учIахъули калунси мутагIялимличи белчIуди таманбарили гIергъи вакIили, разили буриб, сунела гIямру дебали мягIничертили ва кьадричертили дирниличила.
– Гьанна се барес кьаса? – хьарбаиб мугIяллимли.
– Университетлизи кархус!
– ГIур се бирида?
– Хъайчикайрус.
– ГIур се бирида?
– ХIянчи баргили, хъалибарг абикьес багьандан узус.
– ГIур?
– ДурхIни алкIан, илдас багьуди ва бяркъ бедес кьасбирис.
– Илис гIергъи?
– ДурхIни халабиур, илдачибад биштIати акIубхIели, илди бяркъличи бушес кумекбирис.
– ГIур?
– Илдачил барх калунси замана буркIис.
– Илис гIергъи се бирида?
– Ухънаваили, убкIули ургус.
– ГIур се бирида?
МугIяллим сунела мутагIялимличи хIеризурли, гьигьбатур.
– ХIебалас…
– ХIера ил суайс жаваб багьайчи, калунти суалти ва жавабти илцадра мягIничерти ахIен…
Дирхес дигулра нушани заманаличир нушази гIягIнити журала суалти хьардиъниличи, ва жавабти дургниличи.
БицIибси банка
Философияла профессорли студентунас лекция дурабуркIулри. Илини столличи халаси шишала банка кабихьили, дибгIянти къаркъубани бицIиб ва студентунази хьарбаиб:
– БицIилив банка?
– БицIили саби, – жаваб чарбариб студентунани.
ГIур профессорли диштIати хъара касили банкализи какьур, илдани дацIти мерани дуциб.
– Гьанна бицIилив? – хьарбаиб илини.
– БицIили саби, – жаваб бедиб студентунани.
ГIур профессорли гъум касили, ил банкализи какьур. Илди дацIли калунти лерилра мераначи даиб.
– Гьанна? – хьарбаиб профессорли.
– Гьанна кьалли тамай бицIили саби, – бикIар студентуни.
ГIергъиси яргализиб профессорли касили шин чедирад кертIиб. Студентуни чула хатIа аргъили, дукарбяхIиб.
– Гьанна биалли, иш мисалличил нуни хIушази аргъахъес дигулра, банка – хIушала гIямру сари. Къаркъуби – гIямрулизир бегIлара мягIничерти секIал сари: хъалибарг, арадеш, юлдашуни, вегIла дурхIни – лерилра илди хIяжатти сари хIушала гIямру дигили дицIибтили диахъес багьандан, цархIилти секIал деткахъаллира.
Хъара – илди сари хIушабцун мягIничертили детаурти: хIянчи, хъали, машина.
Гъум биалли, калунти лерила дибгIян-хъяшти секIал.
БегI гьалаб банка гъумли бицIалли, илизиб мер кахIевлан къаркъубас ва хъаралис. Илкьяйдали хIушала гIямрулизибра бетарар, эгер лебил замана гьарил кам-хъяшти секIайс харжбиралли, мягIничерти секIайс мер кахIевлан.
ХIушаб манпагIятдеш бихуси секIайзир дузеная, хIушала дурхIначил хIязбирес замана бургеная, хъалибаргличил диреная, юлдашуни хъуммартидая. Мурталра замана баргес дирудая хъулирти хIянчи дарес багьандан. Гьаланачи хIушала гIямрулизир бекIлидиубти секIал декIардарая, калунти биалли илди гъум сари.
Студенткани някъ ахъбуцили хьарбаиб:
– Шинни сегъуна мер бурцуси?
– Ну разилира ил суал хьарбаъниличи. Илди шин нуни ца ити катIибтири, калунси мер буцахъес. Тяп илкьяйдали хIушала гIямрулизибра хIуша сецад дархили диадаллира, камси биалра мер лебси саби акьуси заманалис ва ил хIушаб дигуси кьяйда беркIес вируси сай.
ПатIимат МяхIяммадова
