КIел узи
Жявти замунтазиб кIел адабчебти узи хIербирулри. Халал узила хъалибарг ва бахъал биштIати лебри.
ВиштIал биалли, хъайчикайили ахIенри. Илдани бегIтани кьяйда анкIили хъуми делгIули, хIеркабирулри. БегIти бебкIили гIергъи, илдани букьурла мас бутIиб. Халал узила мякьлаб виштIал узисра хъали тIашбатур. КIилалра хъулри илди-ургар анкIи дихIути усила мерананицун сарри декIардирути.
Халал узини гьар бархIи дугила дехIибайс гIергъи виштIал узила усилизи анкIи калкьутири. «ЧевяхIсини наб гIяхIси хьунулра биштIатира гиб. Илдани наб кумекбирули саби, ухънаваибхIелира цунни хIелтасра. Дила узила биалли чилра агара, илис имцIали диаб анкIи. ЧевяхIси Аллагьли ﷻ нушачи хъарбарибси саби унрубас кумекбирахъес. Унра адабчевси виалли, илхIелира вегIла гъамси, шабагъат имцIабируси саби. Марлира, ну наб ЧевяхIсини гибси кьисматличи разилира», - пикриикIулри халал узи.
ВиштIал узинира гьар бархIи савлила дехIибайс гIергъи халал узила усилизи анкIи калкьулри. «Цунси адамлис дахъал гIягIнити ахIен, - пикриикIулри ил. - Узила биалли биштIати дурхIни леб, илис анкIи имцIали хIяжатти сари. Аллагьли ﷻ унралис кумекбирахъес хъарбариб. Унра адабчевси бусурман виалли, хаслира гъамси тухум, кири имцIабируси саби. Ну разилира Аллагьли ﷻ наб гибсиличи».
Илди кIилилра ил баркьуди дигIянни бирусири. Гьариллис гьанбиркусири суненицун саби итиллис кумекбируси или.
Аллагьли ﷻ илди узбас баракатла гIямру дедиб, илдала лебдеш имцIабикIулри. МухIяммад Идбагли ﷺ буриб: «ГIяхIти баркьудлумани мяхIкамируси сай, вайдешлизибад берцуди бедили. ДигIянси садакьали Аллагьла ﷻ гьими билшахъуси саби. Тухумтала бархбасуни гIердурцнили, гIямру гIеркъадирути сари».
