ДурхIни мижитлизиб
ДурхIни мижитлизиб
Гьачамра ФатIимала уршби ХIясан ва ХIусейн гьалабван жумягIла дехIиба манзил мижитлизи бакIилри. ДехIибала дарили гIергъи Идбагли илди сунела кьукьубачи кабатур. Сунела юлдашунази тиладибариб биштIатачи диги имцIабарахъес: «Ну дигахъусини ишдира дигахъаб».
Абу Гьурайрани Идбагли асхIябтачил буркIуси замана къантIбиэсгу или урухкIули хьарбаиб: «ДурхIни сунела нешличи бархьишав?» или. МухIяммад Идбаг разихIейкиб ва илди мякьлаб батур. Илис дигули ахIенри саби илцад илаб буэс дигути дурхIни гужли илабад арбукили.
Илини иргъахъусири дурхIни нешананицун ахIи, дудешананира абилкьес гIягIнити биъни. СенкIун мурталра нешаначил халабиути дурхIни дудешуначибад бяркъ кахIесили халабиур.
Илала дурабадра мягIничебси мурул адамтала ургаб бетурхуси ихтилатла манзил дурхIни мякьлаб хIебиралли, илди халабаибхIелира гIямрулизир къаршидиркути бекIлидиубти масъулти ирзес бажардихIебиркутили бетарути саби. Гьар бархIила зугIлумази бархибти нешанала мякьлабцун мурталра бирути дурхIнала дагьрилашайчиб гьалабяхI башнира гапла хIебирар. ДурхIнани гIямрула бетуцра цашаликарли чебиуси саби ва цархIил шайчибад чебиуси ахIен.
Нушала дурхъаси Идбагли биштIати илаб гIягIнили хIебиъни чебаахъес ва илцадра чус гIяхIбилзуси мерличибад илди гьарахъбарес дигули ахIенри, хаслира мижитличибад.
