ПасихIчевси мугIяллим
Барх бучIули калунти жагьилтала кьукья цахIнабикили, саби бучIахъули калунси, ухънаваибси мугIяллимличи шадиб бакIиб. Ихтилатлизиб илдала хIянчиличила гъай бетаур: жагьилти гIямрулизир къаршидиркути декIар-декIарти къияндешуначила гьанбуршули, гIярзбухъун. МугIяллим гьарилличи лехIяхъиб, гIяхIлас кофе дарили, кьумурлизир жура-журала кружкабачил вакIиб: шишала, пластмассала, хрусталла, чинила. ЦацадехIти – дурхъати, итдилти – дургIети.
Жагьилтани кружкаби касибхIели, мугIяллим викIар:
– ХIушаб мисалличил иргъахъис. Пикри бяхIчиаая хIушани, лерилра жагати ва дурхъати кружкаби касили сари, гIядатла ва дургIети биалли кьумурлизир калун. ХIушани гIяхIсигъуна чеббикIни, ил саби хIушала къияндешунала бекIлибиубси сабаб. Аргъая хIушани, кружкали кофе бизидирути ахIен, имцIаливан ил дурхъаси бирар, амма цацахIели нушани дужути илизир чедаэс хIейрар. ХIякьикьатлизиб биалли, хIушаб кофе сари дигути кружка ахIенну. Амма хIушани балу-балули гIяхIтигъунти ва жагатигъунти кружкаби касирая, гIур чис сегъуна бикибал хIердирулрая.
Гьанна пикридухъеная: гIямру – кофе сари, хIянчи, арц, даража, жамигIят – илди кружкаби сари. Илди гIямрулизир нушаб кумекли дирути, гIямрула шуртIри къулайдирути секIал сари. Нушани касибси кружкали нушала гIямру белгидирути ахIен, я гIямрула даража ахъбируси ахIен. ЦацахIели, кружкаличи имцIали пикри бяхIчииули, нушани кофела бизидешличила пикридухъес ва тIягIям касес хъумуртулра.
БегIлара талихIчебти чула гьар секIал гIяхIтигъунти лерти адамти ахIен. Илди чула лебси секIайзибад гIяхIдеш касес балули шукру бирути адамти саби.
