Бархьдеш дигуси рурси
Бархьдеш дигуси рурси
Бусурмантала Халиф ГIумар ибну Хаттабличила ишгъуна хабар бурули саби.
ГIумар ибну Хаттабли бархIехъла замана палтарра дарсдарили, гьаман шагьаркад шадиб гьуни бирусири. Илини гIядатла адамла гIердарили, сунела халкь секьяйда хIербирулил хIерикIусири ва илдала зугIлумачи пикри бяхIчииусири. Гьачам илкьяйда къунзикIухIели, ил ниъ дирцуси хьунул адамла хъа мякьлавад аркьули левли, нешлара рурсилара ургаб бетаурси ихтилат аргъиб.
Нешли рурсилизи дирцути ниълизи шин гъудурдарахъес хъарбирулри. Рурси биалли, кьабулхIериркулри, халифли илгъуна барахъес къадагъа барниличила нешлизи гьанбуршули.
ИлхIели неш рикIар: «Ва дила рурси, халифлискIун иличила сеналра балхIебала». Рурсили кьабулагардеш багьахъур: «Неш, се рикIусири гъари хIу? Халифлис чехIебааллира, АллагьлискIун ﷻ сеналра чебиу!».
Халиф ГIумар илцадра ил жагьси рурсила дугьбани хIяйранвариб, хIятта сунела урши илгъуна бархьдеш дигуси рурсиличи хъайчикатес кьасбариб. Илини ил рурсиличи гIягIниси тяхIярли сукни бархьили, сунела уршилис ураркьиб ва бахъхIи агарли илдас магьар дихьиб. Илдала акIубси урши сайри цайли-цаси омейядунала халиф, бархьдеш дигуси вегIбекI ГIумар ибну ГIябдуль-ГIязиз.
