ДурхIнала вичIиръала

ДурхIнала вичIиръала

***
Маза-мас ахIен
- ХIусен, сен дарсличи кьанвиубсири?
- ЦархIилтира кьанбиубгу…
- ЦархIилтира маза-мас кьяйда шурмала
бехIличибад тIяхIбухъалли, хIура тIяхIулхъаду?
КIиибил бархIи, лебилра дарсличиб
лукIухIели, ХIусен хIелукIухIели, учитель:
- ХIусен, хIу сен хIелукIусири?
- Ну маза-мас ахIенра.
Тамашала у
- ХIела дудешлис чи бикIара?
- ХIебержибхIели ГIямар бикIар, бержибхIели
- мурул.
 ***
Кья мякьла ригьунси рурси
 Рабадан, хIулбира някъбира суркдирули:
- Неш, ва неш!
- СейкIусири нешла?
- Се багьандан хIуни ит нушала риштIаси Зайнаб кья мякьла ригьунсири?
- Муртрив, нешла?
- Ит ну усухIели…
 ***
Байхъала жикьила вегI
- Сен висусири, ХIусен?
- Жикьи хIебучIули
- ВяхI, чинаба хIела жикьила байхъала?
- Рузи Зазас бедира.
 ***
БерхIи булхIехъан
- Сен жявли релхIунсири, Мадина?
- БерхIира жявли белхIахъес.
 ***
 ГIяхIил укадли
- Кьурбан, хIу школализи вашулрив?
- АхIенра.
- Мурт вашуда?
- Наб жузи асибхIели.
- Мурт исути илди хIед?
- ХалакаибхIели.
- Мурт халакайусири?
- ГIяхIил укадли, жявли халакайуд, рикIи неш.
ГIИСА ГIЯМАРОВ
- ХIу школализи рашадив, неш?
- Рашаси.
- Къяна бурулри.
- Сен или викIусири?
- СенкIун нуни гьачамалра чехIераири школализи аркьули.
- ИтхIели хIу левси ахIенри.
- Чинав сайри, гьатIи? Шадиврив?
- ХIела хъали чинаба, хала неш?
- Итаб, гьарахълаб, шилизиб тебси саби.
- Вякьи нуни ил гъятIиис.
- Сен?
- ХIу мурталра нушачир руахъес.
 ***
 - Неш, хIу шадир рукьенгу.
- Сен?
- ХIечил набра вакIес дигулра.
Аъбяхъибси бялихъ чебаили, уршили хьарбаиб:
-Сен бялихъ гIу-гIу-гIу хIебикIусив,неш?

Дургъби хIедирар

Ца бархIи чизибадрил дергъ ибси дев аргъили, Мурад дудешличи дугьаизур

- Дургъби се сарив дудеш? - Дургъби бегIлара вайти секIал сари, Мурад. Дургъби диалли, адамти цали ца кабуршу.

- Секьяйда кабуршути? – ургавхъун Мурад.

- Касили тупангуни, цалис ца иргьу…

- ХIедра иргьув?

- Наб игьесра асубирар… Ил бархIи, гIела хъулиб гIябуйчи чебяхIкахъибси дудешла тупанг чебаибхIели, Мурадлис дудешла гъай гьандикиб ва пикриухъун…

БархIехъ хIянчилавад чарулхъуси дудешлис Мурад гьаргалав разили гьуниваиб. Илини буриб

- Дудеш, гIур бекIлил дургъби хIедирар! Нуни хIела тупанг шурмачибад лайбакIира…

МЯХIЯММАД-РАСУЛ РАСУЛОВ