МухIяммад Идбагла ﷺ баракатла хьунри
Жувайрият
МухIяммад Идбагла ﷺ хьунул Жувайрият Бану Мусталакь кьамла бекI Харисла рурси сарри. Ил бану Мусталакь кьамличилси дергълис гIергъи ясирбуцибти-ургар лерсири. Илис Барра бикIусири. Ил сунела кьамлизивадси узикьар Мусафия бин Сафванна хьунул сарри, сайра ил дергълизив алхунси. Ил Идбагличи ﷺ кумекбарахъес ибси тиладиличил ракIибсири сари акьуратахъес. Идбагли ﷺ ил акьуратахъес чеасиб, ил сунес шери ракIалли. Ил кьабулрикиб ва илди хъайчикабииб. Иличила асхIябтани багьурхIели, илала бегIти ва гъамти ясирдешлизиб батес лайикьли хIебиъниличила буриб, ва илди лебилра акьубатуртири. ИлхIели акьубатурти лебтанилра ислам дин кьабулбариб.
Ил багьандан сарри ГIяйша (р.гI.) рикIуси, мажахIят леввиэс чи-виалра сунела кьамлис илцад халаси баракат сархибси Жувайрият ахIенси.
Жувайрият дебали жагаси, гIяхIси, гьамадли гьалмагъриркуси хьунул адам сарри. Идбагли ﷺ ил кариибхIели, ил 20 дус риубсири.
Жувайриятли иш дунья батурхIели, гьижрала 50 – ибил дуслизир ил 70 дус риублири. Аллагь ﷻ разили калаб Идбагла ﷺ хьунул, бусурмантала неш Жувайриятличи!
Сафийя
Дурхъаси Идбагла ﷺ хьунул Сафийя жугьутIунала хIурматчевси бекI ХIуйайя бинт АхIтабла рурси сарри. Сафийяла мурул Хайбарлизибси гъазаватлизив кавшибсири. Илра давлачевси ва хIурматчевси жугьутI вирусири. Хайбарлизибси дергълизир Сафийя бусурмантани ясирруцибсири. Ил Алагьла Расуллис ﷺ шери рукьес кьабулрикибсири ва илини ислам дин кьабулбарибхIели, илди хъайчикабиибтири.
Ил илцадра жагасири, хIятта иличи хIербикIес хьунул адамтира бархли башутири. ГIяйшара (р.гI.) ралли хIерагьесли регIриубли, ил чераэс ракIибсири. Илала дурабадра, ил дебали духуси ва хIурматла хьунул адам сарри. Сафийя Идбаглис ﷺ шери рякьунхIели, ил 17 дус риубсири.
Аллагьла Расулли ﷺ илала дяхIличиб дяхъила къел чебаили, иличила хьарбаиб. Илини бурибсири, сунени муэрлизиб михъирличи берхIи ва кьукьубачи бац кабиили чебаибсири или. Ил муэрличила муруйзи бурибхIели, илини ряхIлизи бяхъибсири ва бурибсири: «ХIед Мадинализивси гIярабунала вегIбегIла хьунул ретаэс дигулрив?».
Идбаг ﷺ вебкIайчи ил илала мякьлар сарри. Гьижрала 50 ибил дуслизиб илини иш дунъя батур. Аллагь ﷻ разили калаб Идбагла ﷺ хьунул – бусурмантала неш Сафийячи.
