ДурхIнас Идбагличила ﷺ хабурти

ДурхIначи диги

Нушала Идбаг ﷺ юлдашуначи хIерикунличи аркьулри. Гьунчив илини зилантачил хIязтавиркьуси сунела рурси ФатIимала урши ХIусен чеиб ва илра сунечил варх арукес дигиаур.

Амма урши хIязлизивад къябвердес хIейгули, хала дудешличивад гьарахъикиб. Ил уцес гIелавадикибси хала дудешличивад ита-иша виркули вебшиб.

Идбагра ﷺ илала гIердирули, илис гIелавад дуцIикIес вехIихьиб, ва ахирра виштIси ХIусен уциб. Дигиличил иличи хъябруцикиб ва байвариб. Нушала Идбагла ﷺ биштIатачил хасси бархбас бирусири. Ил лебтачилра дигиличил, хIурматлил, халатачил кьяйда ихтилатикIули, кьакьалав виаб, хъулив виаб цаван вяшикIусири. Ил чинав виалра дурхIначи диги дигIянхIедирусири, ва баркьбацлизив биштIатасра мер бургусири.

МягIничебси мажлисличи аркьухIелира илини биштIати барх бикусири. Нушала Идбаглис ﷺ гьеч гьанхIебирки илди илаб диргалабулхъан или. Илала пикри хIясибли, дурхIни мурталра халатачил барх, гьарил баркьудилизиб биэс гIягIнити саби. СенахIенну илхIели саби илди вай-гIяхI дагьурли, бяркъчебтили бетарути.

ТIабигIятличилси бархбас

Нушала Идбаг ﷺ викIусири: «Ванза – дурхIнала хIеб сари». ХIеблизиб лебил ванза булхIуси, вава-кьар дакIудулхъуси, арцанти ва къабулданти урцуси замана саби. ХIеб – ванзаличибси лебил тIабигIят чебсаргъуси манзил, дурхIядешлайчи мешуси саби.

Нушала дурхъаси Идбагли ﷺ балусири дурхIнас табигIятличилси бархбас хIяжатли биъниличила. Илини сунела рурси ФатIимала уршби ХIясан ва ХIусен Анасличил барх мурталра кьакьализи хIязта биркьахъес бархьиутири. Ил секIайчи илини халаси пикри бяхIчииусири. Илдала хIязанази сайра вархикили хIязтавиркьусири. БиштIати бегIлара талихIчебси замана – илди авлахъличиб ва кьакьурбазиб хIязтали биркьуси манзил саби. Хаслира хIеблизив ва дуцIрумлизив адам имцIали талихIчевли вирар. ХIеблизиб дунъя вавалибирхъухIели, дурхIнира халабикIар. Хаслира тIабигIятличил бархбас бузахъалли, адамличибси вайси хIял аркьян ва ряхIятвирар.