Дудешла насихIят
Гьачам рурси сунела дудешличи ракIили гIярзрухъун:
– Дудеш, ну рамсурлира, дила гIямру дебали декIти сари, ишди къияндешуни ва масъулти арзес бажардириркули ахIенра, ну даим кабухъунси хIеркIличи ряхIчили куртIрикIусиван билзули саби, дила гIур цIакь агара… се бариша нуни?
Дудешли илизи малхIямли паргъатриахъес бурили, уталичи каратур. ГIур шинничилти хIябал шанг цIаличи чедизур. Ца шанглизи набдари кабихьиб, цархIиллизи гидгари, хIябэсиллизи кофе какьур. Камси замана дикили гIергъи илини шиннизирад набадари ва гидгари дурасиб, кружкализи кофе картIиб.
– Се барсбиуба, се чебиулри хIуни?
– Гидгари ва набадари делхьун, кофе биалли шиннизир дацIиб.
– АхIен, дила рурси, ил чедибад хIеризурхIели чебиуси секIалцун саби. Халбаралли, чIумаси набадари руржути шиннизиб кIантIиси бетаурли саби. ШинкIаси ва назикси гидгари биалли чIумаси бетаурли саби. Илдала куц барсхIебиубли хьалли, руржути шинни илдачи цагъуна асарбарниличибли бухIнабуц барсбиубли саби.
Тяп илкьяйда адамтира – чеди хIерэс цIакьти гьунарагартили бетаэс бирути саби, гьунарагарти ва кIантIити биалли чIумабиубли, дебати ва цIакьти бетарути саби…
– Кофе? – хьарбаиб рурсили.
– Агь! ИлкIун бегIлара тамашаласи саби! Кофе тамай дацIили, дарсдиубли сари, руржути шин бизити держличи шурдатурли. Адамтира илдигъунти хасдешуначилти лебти саби. Илдани саби-алавти тяхIяр-кьяйда дарсдарили, сагатачи, жагатачи шурдалтути сари, илдазибад багаласи пайдара багьудира касили. ХIунира, дила рурси, хIу-алавти аги-кьяйда гIяхIдарес ва жагадарес кьасбара, къияндешуни лебталалра дирути сарину илдас мутIигIмарируд, хIезибад бетаруси бара. ИлхIели ЧевяхIсилира гIеррурцури…
