ДягI, шин ва бархьдеш

Лерри дунъяличир хIябал юлдаш: дягI, шин ва бархьдеш. Илди дахъхIи юлдашуни сарри. Гьачам илди декIардикес пикрибарибхIели бархьдешли ва шинни дягIлизи хьарбаиб:

- Бура гьари, юлдаш, хIу дебали гьалаксири ва лебил дунъя къалабали алавбирулри, хIу дебали мягIничебси тIабигIятла бутIа сабри. ХIу гIягIнибикибхIели чинаб баргес вируси?

ДягIли жаваб бедиб:

- ХIушани ну баргес дирудая авлахъуначиб ва дубурти-ургаб. Илаб хIебаргасли, дукьеная дебали халаси биризла галгаличи, илис «зерзербикIуси бириз» бикIар, илаб хIушани ну мурталра баргес дирудая.

ГIур дягIли ва бархьдешли шиннизи хьарбаиб:

- ХIуни гьар секIал умудирулри ва адамтала милиги ихъахъулри. Варачан бетаурхIели биалли, хIуни гьунчирти гьар секIал гьаркайсулри. ГIягIнибикибхIели хIу чинаб баргес вирара?

- ХIушани ну урхьулизиб, урунжлизиб, хIеркIлизиб яра чIигIя-ургаб баргес дирудая.

ИлхIели шинни ва дягIли бархьдешлизи хьарбаиб:

- Бархьдеш, хIу дунъяличиб бегIлара мягIничерти секIайзибад ца сабри, ва нушаб гьанбиркуливан хIу агарли, гьеч асухIебирар. Бура хIунира нушази, хIу нушани чинаб баргес дирехIе?

- Бархьдешли жаваб бедиб:

- Юлдашуни, хIушани ну хIушачил барх бихIябая, хIушани ну батаасли ва хIушачибад ну арбукьясли, гIур ну чинабалра баргес хIедирудая. СенкIун ну бархьбатурти набра хIейгахъисра, дила хIурмат хIебирути ва ну багьес хIейгути нунира бархьбалтути саби…