Пачас савгъатуни
Гьалабла замана левли уили сай ца пача. Илала биштIати аги, ил багьандан илини кьасбариб ятим урши варгили кIялгIялизив халаваахъес ва сунела мас-мулкла ва лебдешла букьур ветаахъес. Илини аргъиб ца биштIаси шагьарлизиб шел ятим урши хIербирули биъниличила ва илдазивад чи-биалра сунела букьур варес дигиаур. Илини вякьи илди чебаэс ва ахтардибарес кьасбариб.
«ХIушачила пачала гIяхIси пикри акIахъес гIягIниси саби, ил багьандан къайгъибарая хIушала пагьмурти чедаахъес», - бикIулри илдази халати.
ИлхIели уршби пачас савгъатуни чедаахъес хIядурбикIесбииб. Ца уршили урцуйзирад ваяхI дирулри ва илини кьасбариб пачас савгъатлис сурат барес. КIиибил уршили жагали далайикIес балулри – илини далай хIядурбирулри, хIябъибилли уюнти (фокусуни) чедаахъес балулри, авъибиллис сунела багьудлумани пача тамашаварес дигулри – ил бархIиахъайчи жузачил сайри, бегIлара къиянси суайс жаваб бедес хIядурикIули. Илдазивад ца уршицун сайри селичилра декIархIелхъуси. Ил шагьарла къапула къараулчила кумекчили урчала дярхълизив узулри ва урчачила ахIи цархIил селра хIебалулри.
Ца бархIи пача мискинна палтарличил шагьарлизи дуравхъун. Ил бархIиахъайчи илав калун ва гьар секIал чедаиб. БархIехъ биалли урчичи мурдали шагьарла къапула гьалав дакIувиуб.
- Иш урчи милигли саби, - викIар урши илизи. – ХIедра бамсриахъес гIяхIсири. Нушала шагьарлизиб баргирив хIед гIягIниси?
- ХIебаргира, - викIар пача. ДурхIнала замана аги набчил беркIес. Цали урцуйзир някьиш дирулри ва къалабаикIулри хIянчи тамандарес, цархIилти хIядурбикIулри, цали биалли жузачибад бекI ахъхIебуциб. Илдас дудеш гIягIнили ахIенри – илди пачачи хIерлири…
- Нуни биалли цагьакIли аргъира хIу пача виъни, куц-кабиз хIясибли, - викIар урши уруз-хIяцIли, ва хIед кьацI-шин, урчилис биалли дугени хIядурдарира… Пачас бусягIятал ил сунечил варх арукес дигиаур.
ХIера, ил дурхIя ветаур пачала уршили, сенахIенну илала савгъат – адабдешла лишанти – уркIи-уркIиларадти ва дебали хIяжатти сарри…
