Нешра уршира
Нешра уршира
Цагьачам дила неш набчи дугьаризурли тиладибариб, сунес се-биалра асес варх базарличи укьяхъес. Ну сабурагарси сайхIели, наб дигуси ахIенра я тукейзи, я базарличи вашес, амма халаси гьигьра абатурли ну кьабуликира.
Нуша нешлис гIягIнити палтар даргес къяйцIдикIулри. Ил ца вачрукьячирад итилличи рашули, гIур цархIилличи, селра декIарбарес хIерирулри. Гьарил вачрукьяни гьалабихьибси секIал илини халбирулри, амма гIяхIхIебизурли чарбирулри. Замана аркьулри. Нешличил варх ахирагарти базарла къяяназивад вашули ну вамсурра. Наб ил тяхIяр анцIбукьи, гIясивикIесвиира.
Ахирра-ахир нешли сунес палтар декIардариб ва илди далдиркулил халдарес аррякьун. Ил рахъхIи руухIели ну ил лерси мерла гъамирули левли, нешли живарира. ХIерикIус, илини хIевала хъапIни илгIес хIерирули руили. Ил дягIла изай далкIахъунти тIулбачил къайгъилизирри хъапIни илгIес, амма бетарули ахIенри.
Илди тIулби, нешла ахIерти някъби... Илди чедаибмад дила сабурагардешра, вамснира, гIясидешра кIундацIили дигиличи ва уркIецIиличи шурдухъун. Дила хIулби нургъбани дицIиб, ва илди чехIедаахъес къайгъилизив къалабали нешла хIевала хъябличирти хъапIни илгIунра. Дила тIулби руржулри.
-- Се биубли хIед, урши? - хьарбаиб нешли.
-- Селра биубли ахIен, неш, - жаваб бедира нуни, - гьар секIал гIяхIил сари.
Асибси палтарлис арцра дедили, нуша хъули датдихьира. Хъули детаайчи дила хIулбала гьалар нешла някъби сарри. Нушала архIя ахирличи бикиб, амма дила бекIлизиб даимлис калун. БегIлара ахIерти дунъяличир някъби...
Някъби, сарира ну някъбачив вихути, валхути, ицути, палтар-кьяш челгьути, набчи хIеруди бирути ва мурталра наб ванадеш, малхIямдеш ва нешла диги дихути.
Някъби, сарира ну багьандан дулгути, Аллагьлизи ﷻ дугIялизир ну верцахъес тиладидикIути, ну гIеввурцули, кумекбирути. Вирару хъумартес дигичерти нешла някъбала ванадеш?
БархIехъ нешла хъули ацIили, тамашариубси илала някъби дуцили, байдарира.
-- Неш, черрерхи набчирад, мурт-биалра нуни хIу гьимрукIахъили виасли. ХIела уркIи ва хIела някъби дунъяличир бегIлара дигути ва гIяхIти сари. Ну мурталра улгас ва хьуликIус дила някъбира уркIира мурт-биалра хIелаван жагатили диахъес. Баркалла хIед, хIу илгъуна дила лернилис!
-- Ва дила, ахIерси урши..., - рисирииб неш.
Нуша хъябруцдикира.
БегIтала хIурматбирни — ЧевяхIсила амру бихIни, бегIти разибарни — ЧевяхIси разиварни саби.
ХIурматбиреная хIушала бегIтала, кумекбиреная, илдани бурибси бирули разибиреная ва гIяхIдешцун булгеная.
«ХIушала Аллагьли ﷻ хъарбариб Сунесцун дулгахъес ва бегIтас гIяхIдеш бирахъес. БегIти бухънабаибхIели, илдачи хIурматличил диреная ва бурая: «ЧевяхIси Аллагь ﷻ! УркIецIибара илдачи, ну виштIахIели набчи уркIецIибарили кьяйда» - «Аль-Исра» сурала мягIна.
