Пачала уршби
Пачала уршби
Ца пачала кIел урши лебри. Илдазивад ца ахъсири ва жагасири, цархIил биалли, я жагаси, я ахъси ахIенри.
Гьачам пачани иличи мучлаагарли хIеръибхIели, уршили ил хIер хIясиббарили, хIурматличил иб:
«Ва дила дудеш! Ахъли ахIенси адам цацахIели, ахмахличив ва ахъсиличив имцIали духусили вирар. БиштIаси секIал биалли, гьаман дебали дурхъасили бирар».
Цазамана пачалихълизир дургъби дехIдихьиб. Душманти дебали кахтири. КIелра гIярмия дявиличи гIяхIил хIядурдиублири. БегI гьалав душмантачи къаршили дураухъун баягъи ахъли ахIенси пачала урши.
Ил викIар: «Ну дергълизив гIелабад башутазивад ахIенра. Ну нушала пачалихъ багьандан дергълизив вебкIес хIядурлира!» Илкьяйдали бурили, пачала урши душмантачи чевхъун ва бахъал кабушиб.
Амма душмантала гIяскар халасири. Илди чебаибхIели, урухбиубли цацабехIти бургъантала кьукья бубшес бехIбихьиб. Илди чебаили, пачала уршили вявъиб:
«УрухмакIудаяну, гъабзадешличил дургъеная! Нушани цахIнарли чедибдеш сархехIе!»
Пачала уршила жила аргъили, илди уркIичеббиубли, душмантачи гъазаличил чебухъун. Илдала гьужум илцадра цIакьсири, хIятта чула гIяскар камли биалра, илдани душманти бячIун. Урехиагарси уршила бекIдешлиуб пачала гIярмияли чедибдеш сархиб.
Пачани уршила баркьудилис ахъси кьимат кабатур. Илкьяйдали лебилра гIяскарла бургъантира шабагъатлабариб. Уршиличи хIурматличил ва дигиличил хIерикIес вииб. Илини аргъиб сунела я жагали ахIенси, я ахъли ахIенси уршили сунела пачалихълис бекIдешдаресра бажардииркни, жагасира ахъсира цархIил уршиливан ахIи. Уршиличи дудешла хIялани илцадра цIакьдиуб, хIятта ил сунела пачалихъла букьурли варесли пикрибариб.
Халал узини иличила багьурхIели, ил хIясадвиуб ва илала хурег агъулабариб. Илала талихIлисван, рузини сунела хъа улкьайлабад хуреглизи агъу бархаъни чебаили, виштIал узизи хурег хIеберкахъес лишанбариб. ВиштIал узи духусири, ил шакикиб ва викIар:
«ГIяхIти адамти бубкIули, илдала мерличиб вайти адамти калес асухIебирар».
Пачани халал уршили барес дигусиличила багьурхIели, ил танбихIлавариб. Илис гIергъи сунела пачалихъ кIел бутIаличи бутIиб ва гьариллис сунела пай бедиб. Ил анцIбукьлис гIергъи илди бахъхIи ва талихIчебли хIербиуб.
