ЧIичIала ва хъулки

Левли уили сай ца чIичIлуми дурцан. Илини чIичIлуми дуцили илдала агъулизирад дармунти дирутас агъу бирцули уили сай. Агъу бакIахъили гIергъи, илди чула мер-мусаличи дурхьули ва цархIилти дурцули. Гьачамра илини чIичIала буцили чIаплизи кабатурли хъули чарулхъухIели, берхIи гIелабикилри. Ил багьандан илини кьасбариб ца мерличив тIашизурли, дуги беркIес. Ил дебали вамсурлири ва чIапра мякьла кабихьили кайхьунмад ускаун. Ил ускаунхIели, хъулкини илабси чIап чебаили, бигIи чIапра сайра арякьун.

Илавад гьарахъи-кибхIели, илис чIапла бухIнаб се хебал хIерэс дигиаур. Илини сабурагарли чIапла хъар гьаргбариб, чIичIала иличи чебухъи кьацIбикун. Ил чIичIа агъулизивад хъулки левси мерличив пIакьли кайкили вебкIиб.

Ил манзиллизив чIичIлуми дурцан гьанкI-лизивад чеваргъиб ва сунела мякьлабси чIап хIебаргили къяйцIухъес арякьун. УмцIерухъи илини гьарахъли ахIи ванзаличи кайкибси хъулки чеили се бетаурсил шакикиб. Мякьлабси чIаплизибад биалли чIичIала бебшили аги.

Илини тIамадариб: «Иш хъулкили дила гIямру дерцахъиб. Ну ЧевяхIси Аллагьлизи ﷻ улгусири, ара-сагъли хъули чарухъахъес. Дила балга кьабулбариб. Иш пякьирли биалли, иш дунъяличибси сунела жазаъ баргиб».

Хъулкидеш – дебали вайси ва бунагьласи хасият саби. Пикридухъеная хIуша, секьяйда бирарал ил хIяйчив вебкIибсилис. Нушани чебаахIелли нушала юлдашли ручка-кьалам кайсули, нушани бархьси насихIят бурес гIягIниси саби, урхIла секIал кайсес къадагъаласи биъни аргъахъили. Хъулкидешли адамличила вайси пикри алкIахъу, кьимат бетихъахъу ва адамла багьа булъа.