ДурхIнас Идбагличила ﷺ хабурти
Аллагьличи ﷻ вирхни
ГIябдуллагь ибну ГIяббас виштIали виалра, нушала Идбаг ﷺ иличил халаси мурул адамличил кьяйда ихтилатвикIусири.
ГIябдуллагьли ца илгъуна ихтилатличила бурибсири.«Гьачам нушала Идбагли ﷻ ну сунела валриличи катурли викIар: - Дила урши, хIу нуни чумал секIайчи бурсивирури. ГIур илини набзи буриб: - Аллагьлис ﷻ мутIигIсили виадли, Илини хIечи хIеруди биру ва хIу уцахъури. Аллагьла ﷻ уркIецIили мурталра викаби ва ил цаибил мерличиб биаб, илхIели хIуни Аллагь ﷻ хIела мякьлав ургид. ХIед се-биалра дигули виадли, Аллагьлизи ﷻ тиладибирен. ХIед кумек гIягIнибикаллира хIуни Аллагьлизи ﷻ тиладибирен.
Ца секIал хъуммартидра. Рахли лебилра халкь цалабикили, хIед се-биалра гIяхIси барес балбизалли, илдани барес бируси чIянкIли Аллагьли ﷻ хIед белкIунсицун саби. Эгер лебилра адамтани хIед вайдеш барес балбизаллира, илдани барес бируси чIянкIли хIед Аллагьли ﷻ чебаахъибсицун саби. Багьи хIед насибси кьадар белкIи гьалабал хIядурли лебси саби. Иш хабарла мягIна Идбагли ﷺ виштIаси дурхIялизи ЧевяхIсиличи вирхнила дарс кабихьни саби. Амма илгъуна дарс халатасра багаласи саби. СенахIенну, нушани дурхIни халабиахъухIели, дугIла гъай хIедурули, илдази иргъахъес гIягIниси саби дунъяличир кадиркути гьар секIал чIянкIли Аллагьла ﷻ ахъриличилцун сарни детарути.
Аллагьличи ﷻ диги
Анас виштIаси урши сайри. Илала дурхIядеш Идбагла ﷺ мякьлар ардякьун. ВецIал дус ил Аллагьла Расуллизивад ﷻ декIариркули ахIенри. Иличил деркIибти дусмачила хабар бурули Анас викIусири: «Ил набчи бекIлил гьимхIеркIи». Гьарил гIядатла виштIаси кьяйда, Анасра хатIаиркулри ва себиалра балкIли бирулри. Илала хатIаби хIедиэсра хIедири, сенкIун ил виштIсаи дурхIя сайри. Гьайгьайрагу, сунечи гьмидухъесира се-биалра бирули урги, цархIилван биэсра хIебири.
Ил виштIаси виънила сабабли, дехIибала дирухIели, гьаман алавчарли хIерикIулри ва гIягIниагарвирулри. ИлхIели, Идбаг ﷺ викIар Анаслизи: «Дила урши! ДехIибала дирухIели, алавчарли хIермайкIуд, сенахIенну хIу ЧевяхIсила уркIецIилизивад улхъури. ХIерхIейкIули уэс хIейрадли, фарзла ахIи суннатла дехIиба замана хIерикIен, яра себиалра тамашала чебаадли гьалаб ил хIербарану, гIур биалли дехIибала дирен. ГIур илини Анаслис насихIят буриб: «Эгер хIуни савлиличибад бархIи ахъайчи ва бархIи ахъибхIейчибад савлиличи бикайчи хIела уркIи чичи-биалра гьимхIебукIахъес вирадли, илкьяйдали бирен. Ил дила аманат саби. Чили-биалра мицIирсини дила аманат таманбиралли, хIебиалли, илис ну дигахъулра. Ну дигахъуси биалли, набчил варх Алжанализив вируси сай.
Чедиб бурибсилизибад аргъес вирар Идбагла ﷺ хъарбаркь бетурхахъуси адам Алжанализи виркни. Идбагла ﷺ пикри сабри, Аллагьлис ﷻ дигахъести дурхIни бяркъни. Аллагьла ﷻ диги сархес дигуси адамла уркIилизиб биалли, чичилра гьими биэс асухIебирар. Нушани биалли, виштIасила уркIилизи гьими абицIахъулра, иличи вявдикIули ва гьимдуркIули. Нушала МухIяммад Идбагли ﷺ Анаслис сунелайчи мешуси тIабигIят биэсли бяркъ бедлугулри. Идбаг ﷺ дигуси, иличи мешуси ветаэс хIяжатлири. Ил дигуси биалли, Аллагьлисра ﷻ дигусили ветарар. Аллагьлис ﷻ дигуси биалли, Алжанализи виркур.
