ДурхIнас Идбагличила ﷺ хабурти
«УркIила цIедеш»
Нушала Идбагла ﷺ биштIатас хасдарибти, бегIлара дигути дугьби дирутири: «уркIила цIедеш», «хIулбала шала». Илди дурхIначи дугьаилзухIели гьаман пайдаладирутири. ВиштIаси - ил талихI саби… ВиштIаси нушала Идбаглис ﷺ талихIла хьулчи саби.
ВиштIаси – хIулбасра уркIилисра разидеш сай. ВиштIасини уркIира хIулбира талихIли дирцIахъу. Нушала Идбагла ﷺ гIямру Кьуръангъунти сарри. Илала пикрумира баркьудлумира дархли… Идбагли ﷺ «хIулбала шала» или ируси виштIасиличила Кьуръайзиб бурили саби «куррату айунин» - «хIулбас разидеш» ибси мягIна. Рахли беткахъалли хIулбала шала, хIулбала разидеш адам чехIебианвирар. Илкьяйдали виштIасини гIямру даимдирули сари.
Аллагьла ﷻ уми адамтази чедиахъули ва далахъули сари. Кьуръайзиб виштIаси акIни гIяхIла хабарван чебаахъили саби. Тяп илкьяйдали бири МухIяммад Идбаглисра r. Нушала Идбагли ﷺ къаравашли вируси РафигI сунела урши Ибрагьим акIнила гIяхIла хабар багьахъурхIели, лагъдешлизивад акьуватурсири. ВиштIаси акIни гIяхIла хабарлизи халбирни – ил адамлис чили гибсил балнила лишан саби. Кьуръайзиб нушази чебаахъили саби Адамра ХIявара секьяйда Аллагьлизи ﷻ булгутирил чус адабчевси виштIаси вархьахъес: «ХIуна нушаб адабчевси виштIаси гадли, хIедцун саби нушала деза». Кьуръайзиб бурили саби цархIилти Идбагунала балгадугIяличилара ЧевяхIси Аллагьлизи ﷻ чус адабхIяяличилти дурхIни бедахъес тиладибикIути. Нуша акIахъубсини Ибрагьим Идбагла u балгаличила багьахъур: «ЧевяхIси! Ну ва дила насаб хIед дехIибала (гIибадат) дирутала лугIилизи кадерхахъаба. Дила балга кьабулбара!»
МягIничебси:
Чедиб бурибсилизиб нушаб гIибратли биахъубли нушала ЧевяхIси Аллагьли ﷻ чебаахъили саби Суненицун биъни нушаб биштIати лугути ва бяркъ бедахъес ахъри лугуси. Нушаб биалли, ЧевяхIси Кьудратла ВегIличи балга-дугIяличил дугьадилзес саби кавлуси.
ВиштIасилис садакьа
Цагьачам Умм Саламани сунела мурул вебкIили гIергъи калунти дурхIначила МухIяммад Идбаглизи ﷺ хьарбаиб. «Ва Аллагьла Расул ﷺ , наб кири биусив илди дурхIни бархьхIебатурли, нуни абикьнилис, илдикIун дилара дурхIи бетарути саби». Идбаг ﷺ викIар: «ГIе, хIечи шабагъат хIерли бирар, хIуни илди абикьурли, илдас дарибти харжани хIясибли». ЦархIил асхIябли илизи хьарбаибсири: - Ва Аллагьла Расул ﷺ , дила ца динар леб. Бура, нуни ил чис бедиша? - ХIед бати. - ЦагьатIи лебли биалли? - ХIела хьунуйс харжбара. - ГIуррара динар чис харжбариша? - ХIела дурхIялис харжбара…
