БегIлара халаси багьа
Гьачам мургьи-арц дирцуси тукейзи риштIаси рурси ракIиб ва хьанцIа рангла дурхъаси къаркъализибад цалабяхъибси баки сунес бедахъес тиладибариб.
– ХIела ил асес арц леру? – хьарбаиб туке вегIли, - ил кьалли дурхъаси саби.
- Гьайгьай, дила дахъал арц лер, – рикIар рурси ва дибгIян арцли бицIибси тIакьа илала гьалабси кьасиличи бацIбариб.
Тукенчини арц хIисаб-дариб ва викIар: - Амма ишарти арц камли сари иш дурхъаси бакилис.
- Дила гIур арц агара, лерилра арц илди сари. Дила халаси рузи акIубси бархIи сабиули саби, ил багьандан наб дигиаур ил разирарес ва пишряхъяхъес. Нушала неш ребкIили гIергъи ил даим пашмай рашули сари. Нушачи хIеруди бирули, илала бекIлил замана агара сунечила пикририкIес. Ил хьанцIа рангла баки илала хIулбачи мешуси саби…
Туке вегI гIяхIси адам сайри, ил тамашавиуб илала уркIи гьаргдешличи, сунес селра тиладихIебарили рузичила пикририкIниличи. Илини кьасбариб ятимтас кумекбарес, баки жагаси тIакьализи кабихьили чялличил бигьун ва рурсилис бедиб.
БархIехъ рачарархибси жагьил рурси ил тIакьара хили тукейзи ракIиб.
- Иш тукейзибад асибсив иш баки дила рузили? Чумлиса иш? Илала иш асес арц аги. Нуни иш чарбирулра, нушала ишис гес арц агара!
- Дила тукейзибси гьарил секIа багьа дилара ил асибсилара вягIда саби, - викIар туке вегI.
- Наб иш чарбарес диги, - чIумали каризур рурси.
- Илини бегIлара халаси багьа гиб… ХIела риштIаси рузини халатани гес бирусиличиб имцIаси багьа гиб: илини сунела лерти лерилра арц гиб…
