ДурхIнас Идбагличила ﷺ хабурти
ДурхIнас Идбагличила ﷺ хабурти
ГIяхIла хабар
Аллагьла Расул ﷺ мимбарличив тIашлири. Иличил варх «Алжанала тIем» или ируси, сунела рурсила урши ХIусенра леври. ГьанбиркахъехIе, Идбаг ﷺ вебкIибси манзил ил 7 дусцун сайри виубси. Гьачамлис биалли, ил виштIаси урши сайри ва мурталра хала дудешличил варх вирес дигахъи. АсхIябти Идбагличи ﷺ лехIлири ва илини бурусилизибад цалра дев убхIебатес къайгъилизибри. ИтхIели илини юлдашунази ил виштIасила челябкьлаличила разиси хабар бурибсири…
Ибн Харисли сунела наслулизибтази иличила ишкьяйда буриб: «Гьачам нушала Идбаг ﷺ мимбарличи тIашлири. Иличил варх сунела рурсила урши ХIясан ибну ГIялира леври. ЖамигIятличи дугьаизурли ил викIар: - Иш баракатла урши сай. Ну вирхулра иш урши сабабли Аллагьли I бусурмантала кIел кьукьяла ургарти зиддешуни агардирниличи, или ил кIапIуциб. ГIур Идбагли ﷺ хутIба даимбариб. Ардякьун 30-цад дус – хала дудешли бурибси гIямрулизиб бетерхахъур ХIясанни. КIелра кьукья-ургар даршути бархбасуни кадизур.
«Аллагь ﷻ , ХIедра дигахъа…»
Лебтанилара балуливан нушала Идбаглис ﷺ биштIати дебали дигахъутири. Бара акIубти биштIатира бегIтани иличи бикутири гIяхIти балга-дугIя дарахъес. Гьаннара иличиб Усама бин Зайд ва ХIясан ибну ГIяли лебри. Илди илис дебали дигахъутири. Сунес бегIлара дигахъуси ЧевяхIсиличи дугьавизурли, илинира илди дигахъес илини балгадугIя дирес вехIихьиб: - Я дила Аллагь ﷻ ! Ванзала ва зубрала ВегI! Дигахъен илди ХIедра, наб дигахъути кьяйда!
Нушала Идбагли ﷺ биштIатас бяркъ бедлугухIели, цаибил мерличиб дурхIначи диги бирусири. Илини биштIатас дигIянни яра дакIули мурталра балга-дугIя дирутири ва цархIилтазира илкьяйдали бирахъес гIибрат чебиахъусири. Илини балусири, диги агарли халабиути биштIати кьясти, хIясадти, уркIецIиагарти, кьяркьти бетарни ва илгъуна хIебиахъес халаси къайгъи дакIубирусири. Нушала Идбагли ﷺ ИсмягIил, ИсхIакь ва Ибрагьим идбагунани бучIуси балга сунела рурсила уршби ХIясан ва ХIусен мяхIкамбирес багьандан бучIусири: «Дила Аллагь ﷻ , ну ХIечи адамтазибад, шайтIунтазибад, жиндразибад ва цархIилтира агъулати мицIираглизибад ва хIули игнилизибад мяхIкамдеш барахъес ХIела дугьбачил дугьавилзулра».
