Мажлисуни детерхур
Гьар «Ас-салам» газетала номерлизиб нушани даргала районтала шимазир кадикибти анцIбукьуначила багьахъес къайгъибирули дирехIе. ИшбархIи нушани Ахъушала районнизир детерхурти цацадехIти далдуцуни гьаладирхьулра.
Ахъушала районнизибси Дагъистанна Муфтиятла шайзибси хьунул адамтала багьудила отдела хIянчизартани динна бяркъ ва багьуди бедлугули, буресагарли халаси пай кабирхьули саби. Багьудила отделла шайчирси руководитель сари Анисат ГIяблулатипова илала кумекчи ПатIимат Шамхалова. Илдала сипталичил районна хьунул адамти-ургар бусурмантала байрумтас хасдарибти далдуцуни, мажлисуни дурадуркIули, хъалибаргла бекIлибиубси хъарихъ ва къакъбяхъ – хьунул адамтас вягIза-насихIятуни детурхули сари. Ил секIал лебилра шимала жамигIятлис дебали мягIничебси, гIибратчебси ва дигеси анцIбукь саби.
Ахъушала районна Ахъушала, ХIямшимала, Балхъарла, ТIантIала, ЧибяхI МулебкIила, Цугнила, Къаддамахьила ва цархIилтира шимазир илдигъунти мажлисуни детерхур. Илди далдуцуначирти бекIлидиубти мягIнаби сарри: дурхъати Кьурбан-Байрамла ва Хала БархIила байрумти дурадуркIни, дехIибала ва дазала чедетаахъили дирни, адам хIяриирхьнила тяхIяр-кьяйда дагьахъни, чеалкIуси наслулис динна шайчибси бархьси багьуди ва бяркъ бедлугни ва цархIилтира. Ил дебали багаласи ва пайдачебси анцIбукь саби хьунул адамти цабирнилизиб ва шими-ургарти бархбасуни уржахънилизиб.
Ил хIянчи челябкьлализибра даимбарили бирар.
Къаддамахьила шилизибадти МяхIяммадов ГIяли ва илала хьунул ГIялиева ГIяйшат бахълис гIибратласи хъалибаргла бегIти саби. ГIяли букIунни узули 40 дус калунсири, ГIяйшатлира илдицад дусмазир колхозла хIянчи дарибти сари.
Гьанна илди 90 дусла гIямруличи гъамбиубли биалра, «Ас-салам» газетала марти гьалмагъуни саби. Дигеси саби илди гьести гIямрула адамтани нушала газета кайсули ва цалис цали бучIули биъни. Газетала халаси кьимат биру, ва гIергъиси номер бакIахъес хIерли бирар. Илкьяйдали гумайла цалабикибтасра бучIули, динничила алкIути суалтас илизир жавабти дургу.
Ил тяхIярли ишав гьанушес вирар нушала газеталичил бархбас бузахъуси ГIусбанов Ибайра. Ил школализив францияла мезла мугIяллимли дахъал дусмазив узули, дурхIнази багьудира бяркъра касахъиб. Къаддамахьила хIурматла адамла уличи лайикьикибси сай. Шантани иличила буриб, гьачамалра адамтачи гьимхIевкIили ва къалмакъар хIедарили, халаси сабурличил хIериубси виъниличила. Илала сахаватдешличила гьанбуршули, гьар алапа касибхIели, биштIатас ва халатас буртIули, хъули байхъалацун сабри биахъуси ибси хабарра буриб. Илала дурабадра Ибайли дахъал дусмазиб мижитлаб акбар бучIули калун, унра шимазира вархли маслигIятличи вашусири.
Имам МяхIяммад Рабаданов ва редакцияла хIянчизар МяхIмуд Рабаданов дурхъаси ГIярафала бархIи илдачи гIяхIладли баили, мубуракбарибтири. Лебил редакцияла шайзирадра илдас ва шила шантас газетала кьадри-кьимат бирнилис баркалла балахъулра ва арати гIямру, баракат, ЧевяхIси Аллагьла ﷻ разидеш булгулра. Амин!
