«Алжана нешанала кьяшмала удиб саби…»
Илгъуна уличил гьалабван Ахъушала районна Ахъушала шилизибси культурала Юртлизиб хьунул адамтас хасбарибси мажлис бетерхур. Илис сиптакартили биуб Муфтиятла шайчибси Ахъушала районна багьудила отделла руководитель МяхIяммад Рабаданов ва хьунул адамтала отделла бекI Анисат ГIябдулатIипова.
Балбуцлизир бутIакьяндеш дариб Ахъушала С.Кировла уличилси цаибил школала бучIантани ва дурхIнала анхъла биштIатани. Илдани нешанас багъишладарибти назмурти делчIун.
Мажлисличи жибарибти гIяхIли сабри Ахъушала районна жагьилтала политикала ва спортла шайчирти къуллукъунала управлениела хIянчизар Фатима ГIябдуллаева, дарган мезличил дурабулхъуси «Ас-салам» газетала редактор Наида Гъуруева, Каспийск шагьарла багьудила отделла хIянчизар Асият ИсмягIилова ва цархIилтира.
Мажлис Кьуръа аятуначибад бехIбихьиб. МяхIяммад Рабадановли адамла гIямрулизиб хъалибаргла кьадри-кьиматличила ва сабурбирниличила насихIятуни дуриб. Илини гьалабван школала бучIанти-ургаб бетерхурси «Адаб-хIяялашалти мургьила тяхIяр-кьяйда» конкурсла бутIакьянчиби грамотабачил ва арцличил шабагъатлабариб.
Фатима ГIябдуллаевани лебил цалабикибти илгъуна баракатла балбуцличил мубаракбариб ва челябкьлализиб илдигъунти далдуцуни гьатIира дахъал дурадуркIнила пайдаличила буриб.
Балбуц Анисат ГIябдула-тIиповани устадешличил бузахъулри, иличир илини жагати нашидуни зайдухъахъун.
Сунела яргаличир гъайрухъунси Наида Гъуруевани исламла диннизиб хьунул адамтала мерличила бурули рикIар: «Нушала пергер ва гьарил гIямрула шайчи чебетаибси диннизиб нешла даража Кьудратла ВегI Аллагьли ﷻ дебали чебяхIбарибси саби. Илала жавабкардешра ахъти сари, сенкIун илала някъбазиб саби чеалкIуси наслубала бяркъ. Бяркълизибад саби дигахъуси сецадра адабчебтили, ламус-хIяялашал ва рухIлашал давлачебтили, духутили бетарарал дурхIни челябкьлализиб». Илкьяйдали илини буриб «Ас-салам» газетала бяхIяназир сегъунти темаби гьаргдирулил ва масъулти ахъдурцулил.
Асият ИсмягIиловани дурхIнала бяркъличила баянбирули буриб: «Нуша нешаназибад саби дигахъуси сегъуна бяркъ кайсусил ва халабаибхIели сегъунтили бетарутил дурхIни. Адамлис ЧевяхIсини бедибси давла ва дурхIни иш дунъяла жагадешуни сари. Нушачи давла гIягIниси тяхIярли харжбарес ва биштIати адабчебтили бяркъес хъарси саби. СенахIенну дурхIни нушаб Аллагьли ﷻ аманатбарибти саби бяркъяхъес багьандан ва илдас жавабкардеш дихути сари».
Анисат ГIябдулатIиповани ахирличиб викторина дураберкIиб ва суалтас дархьти жавабти чардарибтас МяхIяммад Идбагличила ﷺ жузи пешкешдариб. «Ца ишгъуна баракатла мажлисли азир вайти мажлисунала бунагьуни урисути сари», - рикIи ил. ЧевяхIсини кьабулбараб гьарил гIяхIси балбуц! Амин.
