Ифтарти - байрумти детерхур

Ифтарти - байрумти детерхур

Дурхъаси Рамазан базлизир гьар дуслизир кьяйда ишдусра гIядатлибиубливан нушала республикализир дубкабалтнила далдуцуни – ифтарти детерхур. Гьарли – марли илди ифтарти – байрумти сарри сенахIенну адамтас халаси разидеш бихухIели. Адамти уржахъес, илди–ургаб диги имцIабиахъес ва цабиахъес кумекли дирухIели.

Рамазан баз бехIбихьибхIели, МяхIячкъалала бекIлибиубси жумягIла мижитлизиб Дагъистан Республикала Муфтиятла сипталичил Рамазанна чятир абхьибсири, ва илаб гьар бархIи 5 азирцад адам дубкабатахъес имкан бикIусири.

Илаб гьар бархIи правительствола хIянчизартани, депутатунани, спортсментани, спонсортани ва гIядатла адамтани дуббуцибти адамти дубкабатахъес чула шайзирад хуреглис арц гIяхIбаркьла «Инсан» фондлизи декIардирутири. Цаибил ярга бехIбихьибсири «КАRJEWY» мургьи-арцла юртли, илкьяйдали цархIилти адамтанира.

Шинничил ва чумиздагуначил дубкабатурли гIергъи, гьалабирхьуси хурег имцIаливан плов сабри. Илкьяйдали чудни, кьацI, цIедеш, овощиби ва муридешунира дуртIулри.

 Ила цалабикибти – ургаб жура-журала халкь чебаэслири, дурабад бакIибтира лебри, шагьарлантазибад илди багьесли декIарбулхъулри. Амма бакIибси мерла хIурмат бирули, адабдеш дакIудирулри.

Дебали дигесири цалабикибти-ургаб халатачил барх биштIатира дубкабалтухIели, ва гьарли-марти бусурмантала гIяхIти гIибратуни гIерисухIели.

Цалабикибтас дурути вягIза-насихIятунани ва зайдикIути нашидунани балбуц гьатIира жагабарулри.

Дубкабатурли гIергъи жамигIятла дехIибайчи кабилзутани мижит бицIнира гьатIира дигеси анцIбукь саби. Хаслира таравихIла дехIибайчиб кали, ЧевяхIси Кьудратла ВегIлис гIибадат бирухIели.

Дебали дигеси саби илдигъунти мажлисунани бусурманти уржахъни ва цабирни.