МУСЛИМАТ

Хьунул адамла дуббуцари

Дуббуцари Кьиямала бархIи вирхусилис гьалабизли бирар

Хьунул адамлис Рамазан базлизир мурул адам кьяйда дубрурцес чебси саби. Ил багьандан илис сунела лезмиличил дебали мяхIкамли рирес чебиркур: пайдаагарти мезлизи хIейхъули ва имцIати гъай хIедирули, хIятта илкьяйдали илис цархIилти бузразирра риэс гIягIниси биалра. Гьеч хъумартес асухIебирар Рамазан баз – хасси ва бунагьуназибад умубируси баз биъниличила. Нушала лезмили, нушала дуббуцари заядарес бирар.

ВиштIасилис баибти хьунул адамтас ва ниъли балхутас дуббуцибхIели чула яра виштIасила арадешлис урехи лебли биалли, дуббуцари уббатес асубируси саби. Ил тяхIярлизиб балуси тухтурличил пикри цалабяхъес чебиркур.

Рахли нешла арадешлис зарал биубли биалли, илини сагъриубхIели, 1 муд анкIила гIякIа бедес чебси ахIен (650 грамм). Эгер илини дуббуцари виштIасилис зарал бирнила урехили урдатурли риалли, илини илди гIергъиси Рамазан баз сабаайчи черахъес чебси саби. ВиштIасила арадешлис урехи лебли урдатурли риалли, гьар уббатурси бархIилис гIякIа 1 муд анкIилара бедили, урдатурти бурхIнира черахъес гIягIниси саби. Рамазан базличила бурули, имцIабарес вирар, гьарил дубруцибси бархIилис хьунул адамли ЧевяхIси Аллагьла ﷻ уркIецIира халаси шабагъатра касес имканбикIур. Се тяхIярли? Сунела хъалибарглис савли абизахъурли, акбар белчIайчи хурег барили букахъес кумекбирни багьандан. Илкьяйдали бархIехъ дуббатахъесра беркеси бирули риалли.

Савли хъалибарглис хурег балкьаахъурли, илди букахъес булхIахъуси хьунул адамла юлдашунили саби биахъес зубрачибти малаикуни ЧевяхIсилизи тиладибикIути саби. Илгъуна хьунул адамла даража ЧевяхIси Аллагьла ﷻ гьалаб севан ахъбирусил балули. Илкьяйдали дубуцибси адам хурег барили, дубкатахъалли, илис дубуцибсилисгъуна кири лебси саби. Рамазан базла фарзла дуббуцарла дурарад, гIуррара лерти сари суннатла дуббуцарира. Илди дуцес дигули риалли, хьунул адамлис муруйзибад ихтияр сасес гIягIниси саби, яра ил сапарличивхIели илди дурцес рирар.

Хурег балкьарахъни

ДулекIлизирад котлетуни

Диъбазибад бегIлара пайдаласилизи халбируси саби дулекIла диъ. Ил биштIатасра халатасра дебали дигахъу. ВиштIасилис раибси хьунул адамла гемоглобин ахъбуцес багьандан ил бегI гьалаб маслигIятбиру. ИшбархIи илизирад котлетунала рецепт гьалабирхьулра.

ГIягIнидиркур:

дулекIла диъла — 500 грамм;

1 — набадари; 1 — жерши;

2 — халати буртла кьулса;

4 — халати кьулса бетIула;

1 — чяйла кьулса зела; содала кьякь;

дерцIес гIявадеш. ДулекI чедибси камлизибад умубарили, жершиличил барх диъ лукьан машинализиб белкьеная. Набадари бибгIянси теркализибад дураили, буртличил барх диъла фаршлизи бархаая. Зе, бетIу, содала кьякь имцIадарили, гIяхIил гъудурбарая. БуцIарбарибси табализи гIявадеш кертIили, ургабси цIаличир чебхьла чебихьили, дерФцIая. Илдачил барх столличи овощунала салатра кабихьес вирар.

ДулекIлизибад паштет

ГIягIнидиркур:

дулекIла диъла — 400 грамм;

1 — жерши;

1 — набадари;

200 г — кIема;

1 — чяйла кьулса зела;

дерцIес гIявадеш. Гьаланачи дибгIяндарибти жерши ва набадари гIявадешлизир дерцIая. Умубарибси дулекI кесекунар барили, 5-7 минут берцIили, цIа бишахъеная. Чебхьла чебихьили, 20 минут гIурра батирая. Илди дяргIибхIели, блендерлизи кадихьили, зе, перец какьурли бибгIянбарая ва кIантIибарибси кIемаличил бархаая. Ца-кIел сягIятлис холодильниклизи кабихьая. Бизити бутербродуни дарили, чяйличил дарх гьаладихьая. Беркала ашагьаб!

Корицала пайдаличила

Нушани балули кьяйда, корица бизили тIембикIуси секIал саблин тортанази, пирогунази ва дужути соканази бархиуси саби. Илала пайдаличила сагати рецептуни гьаладирхьулра.

Корица бекIла гъез умчIниличи къаршили

Корицализир А, В, С витаминти лерти сари, хIи жигарли ласдикIахъули, бекIла гъез сагадирахъули ва цIакьдирахъули дузути. Варъара корицара цуг-цугли дархаили, бекIла кам бакили, 20 минут батирая. ГIур ванати шинничил бирцая.

Корица микробуначи къаршили

КьерхIе рангла галгала камлизир бактериябачи ва микробуначи къаршити секIал имцIали дирути сари. Ружери бакIибти шиннизи корицала 5-6 къегI кадихьили датирая. Шин ванадиубхIели, ила кьяшми кадатурли 20 минут даталли, илди камли майъали далта.

Корица уркIи далкьниличи къаршили

УркIи гъудурдикIалли, 1 шинна стакан ва корицала 1 къегI 10 минут руржахъеная. ДяргIяхъили, кункдеш биайчи, кам-камли дуженая.

Корица муридеш букниличи къаршили

Корицали хIилизибси глюкоза гьунчибикахъили, дурусбиркахъу. Ил багьандан диетологунани муридешличи иштяхI камбиахъес, ил беркайзи бархаахъес маслигIятбирули саби. Савли дужути кофелизи, яра букуси кашлизи бархаили халбарес вирар.

Гъярила чяй

ХIебла бугIярси бархIи кьаркьа иммунитет ахъбуцес кумекбиру гъярила (облепиха) чяйлира.

ХIушаб гIягIнидиркур:

шин — 500 мл;

гъяри — 150 грамм;

шумери — 1-2 кIапIи;

лимонна байхъала; апельсинна байхъала; варъа бизидеш хIясибли. Гъярила цIедеш камти дуцIар шин дархаили, кьуми тIутIухIедиэсли, пIянчIаая, кьумазибси гIявадешла кьутIкьудеш дурахIебухъахес багьандан. ГIур илдази шумери, лимонна ва апельсинна шин дархаили гъудурдарая. Илдази 60 градусла дуцIарти шин кертIая, илабси С витамин имцIали калахъес багьандан. Варъа бархаили, 15 минут батурли гIергъи бержес вирар. Арали калабая!