Хурег балкьарахъни

Хурег балкьарахъни

Туркунала бехIцIури

Илди жура-журала дирути сари. Нушани илдала кьарличилси жура гьалабирхьулра.

ГIягIнидиркур:

Декь – 600 гр;

шин – 310 мл;

чакар – 1 халаси кьулса;

хамирдан (дрожжи) – 2 чяйла кьулса;

гIявадеш – 2-3 халати кьулса;

бурт – 150 гр;

кIема – 30-40 гр;

петрушка – 1 хала.

Балкьарахъни:

Ванати шиннизи чакар, хамирдан ва 1 халаси кьулса декьла какьурли шикьдарая ва пушдизайчи датирая. Буртлизи зе какьурли, гъудурбарая ва гIявадеш имцIабарая. Кьямлизи декь какьая, ила хамирдайчилси ва буртличилси гъудурмай кертIили, бетIу башеная. Ил кIантIиси, някъбачи цIапIхIелкуси бетаэс гIягIниси саби. БетIу 10-12 мяваличи бутIили, кIапIбарили 10-15 минут батирая. ГIур илди тIинтIдарили (гIявабакибси халаси кьямличир тIинтIдаралли, табализи кадихьес гьамадли бирар), табализир кIелра шайчирад дерцIахъая. ДерцIибти бехIцIури кьисдарибти петрушкаличил ва кIемаличил дакая.

Диъличилси салат

ГIягIнидиркур:

Вералибяхъибси гIяргIяла диъ – 300-400 гр;

пекинна капуста – 150 гр;

хIяжла хъара – 1 банка;

хIяжланкIи – 1 банка;

сухарикуни – 1 кьачIа;

гидгури – 6;

майонез, зе, исиут – бизидеш хIясибли.

Балкьарахъни:

Диъ тугъадли кьисбарая, капуста бибгIянбарая. Делхьи дяргIяхъибти гидгури кесекунардарая. Салат кабирхьуси кьямлизи илди лерилра кадихьили, зе ва исиут какьая. ГIур хъара, хIяжланкIи ва сухарикуни имцIадарая ва майонез бархаили гъудурдарая. Салат хIядурли саби.

===========================================================

МамалгIяла компот

МамалгIя – 150 гр; апельсин – 1; чакар – 150 гр. Руржути шинна 1,5 литрлизи кьисбарибси апельсин, чакар ва мамалгIя какьая. 5 минут цIаличиб батурли гIергъи, компот хIядурли сари.

Беркала ашбиаб!

Лаюса Юсуфова