Ислам динна чебяхIти хьунул адамти
Бинт Сафван Бусра
Ил кьурайшитунала кьамла хьунул адам сари, ислам дин кабизайчира сунела гIяхIти баркьудлумачирли машгьурриубси. Ислам дин кабизурхIели, илала жамигIят-ургабси даража гьатIира чIумабиуб гьалабличибра дебали. Ислам динни илала къияндешуни черардукиб.
Ибн ХIиббанни гьанбушиб: «Ил хьунул адамла Хадижачил -бусурмантала нешличил тухумдеш лебси саби».
Сафванна рурси Бусра даим нушала Идбаг ﷺ вируси мажлисуначир рирусири. Идбагла ﷺ дурутачи лехIирхъусири ва илкьяйдали илини 11 хIядис даахъибтири нушачи Аллагьла Расулла ﷺ. ЧевяхIси Аллагьли ﷻ кумекбараб нушаб асхIябтазирадси хьунул адам Сафванна рурси Бусрачи мешутили диахъес.
ЗубагIат бинт Зубайр
ЗубагIат бинт Аль-Зубайр бин ГIябдул МутIалиб бин Гьашим аль- Кьурайшия аль-Гьашимия, Идбагла ﷺ дудешла узила рурси сари. Аллагьла Расулли ﷺ ЗубагIат гIяхIси адамлис - Микьдад Бин Асвадлис шери редибсири. Илди хъалицIа ЗубагIатлис баракатла сарри, сенкIун Микьдад илис Идбагли ﷺ декIарварибсири.
Микьдад гьарли-марли бегIлара гIяхIти асхIябтазивад сайри, Аллагьлизивад ﷻ урухкIуси ва гIяхIси хIял-тIабигIятличилси. ЧевяхIсини илдала хъалибарглис баракат бархьиб, ва ЗубагIатли Микьдадлис урши ГIябдуллагь ва рурси Каримат баркьиб. Илдани ислам дин тIинтIбирнилизи белгиси пай кабихьибсири. ЗубагIатла даража ахъсири ва Идбагли ﷺ ил кьиматларирусири ва хIурматбирусири. Идбаг ﷺ иличи гIяхIладли вашухIели, сунела някъбани барибси хурегли валхусири. Гьачам илини маза белгьи Идбаглис ﷺ бархьибсири.
Ил хьунул адамли нушачи Аллагьла Расулличирад ﷺ 11 хIядис даахъибти сари. Аллагь ﷻ разили калаб асхIябтазирадси ЗубагIатличи, суненира бегIла камсилизиб биалра МяхIяммад Идбаг ﷺ гIеввурцули калунси. Амин.
