Алжанала бегIлара гIяхIти 4 хьунул адам
(бехIбихьуд гьалабси номерлизиб)
Марьям
Дурхъаси Кьуръайзиб цацун саби хьунул адамла у гьанбуршуси - Марьям. Ил ГIимранна ва Ханнала рурси, ГIиса Идбагла неш сари. Илала у Кьуръайзиб 33 -йна гьанбуршули саби. Ил бегIлара гIяхIти, пергерла ва жагати дугьбачил сипатрарили сари. Марьям - шурбаталли, ЧевяхIсилис къуллукъбируси ибси саби.
Марлира, Марьям мурталра ЧевяхIсилис гIибадатлизир сарри, ва Илис тамай мукIурлири. Ил Аллагь ﷻ дигниличил ва Илизирад урухкIудешличил машгьурриубсири. Кьуръайзир ил динна кьяйдурти дузахъуси ва адабчерси сарливан сипатрарили сари.
Малаикунани бурибсири: "Ва Марьям, хIу Аллагьли ﷻ черрикIибсири ва дунъяла хьунул адамтачирра черяхIрарибсири. Ва Марьям, хIела Аллагьлис ﷻ мутIигIли рии, сужда бира".
Ил хъарбаркь таманбирули ил рулгусири кьяшми демдайчи. Илала Аллагьлизирад ﷻ урухкIудеш илцадра цIакьсири.
Идбагли ﷺ буриб: "ГIимранна рурси Марьям сунела манзилла бегIлара гIяхIси хьунул адам сари. Дила умматла бегIлара гIяхIси хьунул адам риалли, Хадижа сари".
Ил Аллагьла ﷻ уркIецIиличил гIерруцибсири:
1.Иличи бикайчи къуллукъбирахъес уршбицун сабри бурцути, илала нешли дугIя барили, илра руцибсири;
- Ил Закарья Идбагла хIерудилиур сарри;
- Ил ЧевяхIсини Алжанала хурегли ралхусири;
4.Аллагьли ﷻ илис имкан бедибсири ЖабрагIил малаик чеахъес, ил чеэс идбагунасцун асубирухIели;
- Аллагьли ﷻ ил ва илала урши шайтIайзивад верцахъиб;
6.Илала урши ГIиса Идбаг виштIахIейчивад гъайикIусири, ва нешличи бугьтан чебихьибхIели, гIерруцибсири.
Асия
Ил Музагьимла рурси рирхуси ва Аллагьлизирад ﷻ урухкIусири. Сунела кьисмат хIясибли, ил сай чевяхIсилизи халируси, зулмукар ФиргIяванна хьунулли ретаур. Палчини ФиргIяваннизи бурибхIели исраилла дурхIназивад цали сай тахличивад увяхIуршниличила, илини буйрухъбарибсири лебил акIубти уршби кабушахъес.
Муса акIубхIели, илала неш иличила дебали кьакьарикIусири. Амма ЧевяхIсини илис умут бедиб уршилис урехи хIебирниличила ва чIаплизи катурли, Нил хIеркIлавад вархьахъес хъарбариб. ВархьибхIели, хIеркIла дублав ил Асияли варгибсири. Илини тиладибариб муруйзи ил чучив ватахъес. Илкьяйдали Муса Асияла хIерудилиув ФиргIяванна хъулив халавиусири.
Мусачи идбагдеш хъардарибхIели, илини Аллагьлис ﷻ булгахъес жибирусири. Амма ФиргIяванна гужлиуб имцIати адамти Идбагличи бирхути ахIенри. ФиргIяванничи лехIхIяхъибти биалли, танбихIлабирутири.
Илис сунела хьунул Асия Цаси Аллагьличи ﷻ рирхни багьурхIели, илини ил гIязабруркIахъес хъарбарибсири дин бархьбатайчи. Амма илала иман илцадра цIакьсири, хIятта лебилралис гIибратли биуб.
Ил Аллагьличи ﷻ дугьаризурсири сунес Алжанализиб хъали барахъес ва ФиргIяваннизирад рерцахъес. Асияли Аллагьличи ﷻ диги чеббикIиб, иш дунъяла лигIматуни датурли, даимти гIямру чердикIиб. Ил сунела зулмукар муруйчи къаршили дурарухъес уруххIериуб ва дин багьандан жан дедиб. Идбагли ﷻ ил чебяхIти хьунразирад цализи халрарибсири. Марьямра Асияра лебтачибра даража ахъти саби.
Наида Гъуруева
