Секьяйда муруйчи асарбируси
ХIясан аль-Басрини бурусири: «Гьачам хIяж бирухIели, Маккализибси базарличив палтар асес тIашизурра. Илав ца вачрукья сунела мас гапбирули, тIашагарли хъямани виркьулри. Ну пикриухъунра, илгъунализибад селра хIейсис или, ва цархIил вачрукьязирад гIягIнити секIалра асили, арякьунра.
КIел дусла гIергъи, нуни сагадан хIяж барира ва базарличи вакIира. Илав ит баягъи вачрукьяра леври. Амма иш гьакIлис илини сунела мас я гапбирули ахIенри, я хъямани виркьули ахIенри.
- ХIу ахIенрив гьатIи гьалав мас гапбиран? – хьарбаира нуни илизи.
- Сайри, - викIар ил.
- ГIур се бетаурли илкьяйда варсиубсири, гьалабван мас гапхIебирулригу?
- Дила гьалар хьунул лерсири, илис сецад арц хаслира камдилзутири. Ил разирарес или къайгъилизив вираси. Ил ребкIили гIергъи, нуни цархIил хьунул кариира. Гьар бархIи савли ну базарличи вачарличи дураухъайчи ил набзи рикIуси сари: - Аллагьлизивад ﷻ урухкIен, ва нуша дахес хIялалси ахIенси, хIярамси секIал мабихид. ХIуни камси арц хадли, нушани сабурбирехIе. БекIлил селра агарли вакIадлира, нуни балализирад гьимирти дарили тамандирис ва илди дицили, яшавбирехIе.
Буралли, ил мягIнала хIядисра лебси саби. Адабчебти хьунри чула муйли яшавбарес сапарличи дурабулхъухIели, бикIутири: «ХIялалсицун хили чардулхъеная, хIуша чардухъайчи нуша гушли калесра хIядурлирану».
Нушабра рузби, багьес чебиркур, чIянкIли хIялалсилицун биъни адамла хъулиб баракат бирахъуси. Илкьяйдали хьунул адамли бируси хурег дазайчил биралли, хъулибтира адабчебтили бетарар.
