Ислам динна чебяхIти хьунул адамти
Умму ХIаким бинту Аби Суфьян
Илини Макка буцибси бархIи ислам дин кьабулбарибсири ва Идбаглис ﷺ мардешла хъя бедибсири.
Умму ХIаким адабчевси вархкья Абу Суфьян бин Харбала рурсбазирад ца сарри. Аллагьлис ﷻ дигуси Расул, МухIяммад Идбагла ﷺ бекIдешлиуб Макка буцили, чебяхIси чедибдеш сархибхIели, илала уркIилизи иман хьурабиубсири, ва илини бусурман дин кьабулбарибсири.
Умму ХIаким нушала бусурмантала неш Умму ХIябибала рузи сарри. Илкьяйдали ил Муавиялара рузи сарри, ЧевяхIси Аллагь ﷻ разивиабну чучи.
Ил тяхIярли Абу Суфьянна рурси Умму ХIаким сунела насаб хIясибли, сунела рузи лерси Идбагла ﷺ хъайчил рархрасунси сари.
Умму ХIаким ЧевяхIси Кьудратла ВегIличи уркIи-уркIиларад рирхаур. Илини багьур исламла динна дяхIцIилиуб урехилизибад мяхIкамдеш ва къакъбяхъ лебни. Умму ХIаким Иязла хьунул сарри, ил биалли сайри бегI гьалаб ислам дин кьабулбарили, Аллагь ﷻ ца виъниличи бирхауртазивад ца.
ЧевяхIси Кьудратла ВегI Аллагь ﷻ разили калаб адабчерси Умму ХIакимличи. Амин!
