Рузби

Ца жагьил адам дунъякад къяйцIухъес ва сунела шагьарлизиб хIебаргибси талихI баргес, архIяличи дуравхъес кьасбариб. Нешли илизи тиладибариб, сари мицIирли лералли, архIяличир сунес цIикурира раргахъес.

Илала юлдашунира жявлил хъайчикабиилри ва илизира хъалицIа дуцахъес махбикIулри. Амма ил баъличи хIерикIули хьалли, чилра декIаррарес хIейубли левалри.

Гьачам сай хьуравиубси шагьарлизибси тукейзир илини буресагарли жагаси рурси чераиб. Илдигъунти илис сунела шагьарлизибра чебиутиригу, амма ил сеналра декIаррулхъулри. ГIергъила бархIи уршилис илала рузи чераиб, ил, илцадра жагали хIериалра, тукейзибси хIянчи жигарли бирулри.

Уршилис илдигъунтачил узес кьадарбиубсири. ХIябэсил бархIи тукейзи вякьунси илини, илдала хIябэсилра рузи чераиб. Илини урши иш гьакIлис жагадешли ахIенрину тамашаварибси, малхIямдешли сайри. Ил, чилра декIархIейрули, лебтачилра жагали, малхIямли, пишряхъили гъайрикIули, кункли вяшрикIули, сунечи хъарси бирулри. Уршилис дигиаур илдала хъалибарглизиб чум рузи лебал багьес ва тукейзирад аркьуси рурси хъули ретаайчи гьунирратур. Хъа гьалав ил чеибси гьести гIямрула хьунул адамли хьарбаиб ил чевалкIил, ахIенал.

- ГIе, ну чеввалкIунра, - жаваб бедиб уршили. Илкьяйдали ил илдала хъулив вагьариуб, някълаб бизити чяйла пигьалаличил. Рузбазирад чидилли сунес къуллукъбирулрил илини багьес хIейуб. Ца ити бируси ихтилатлизиб хъалибарглизибти цархIилти адамтачила хьарбаэсра сабаб адхIекIуб. Нешли илдачи гьарракIили, рурсилизи тиладибариб уршилис гьуни чебаахъили, сунес гIягIниси мерла гьунивватахъес. Гьунивватес цаэсил рузи дурарухъун.

ИхтилатбикIули, илди кIиибил рузила тукейчи сабаиб. Илизи гIяхIли каленра или, рурси ила рухIнарухъун. Илис гIелавад тукейзи ацIибси уршилис илини хIянчизартас къалабали, чедетаахъили хъарбаркьуни дедлугуси рурси чераиб. Иличи ил шурряхъибхIели, уршила тамашадиубти хIулбала хIер чебаили, хIябъибил рузи кьяйда малхIямли пишряхъиб. Гьайгьайрагу, ил рурсила рузби аги. Уршили хIяблизи халрируси ил цацун сарри. Илизир сарри илди лерилра къилликъуни дагьардулхъути. Иличи шакикибси уршили хъя бариб сеналра ил рурсила дигай сархес ва илала нешличи чарухъи сунела мурад барахъес тиладиухъун. Сунела нешличи урши ил цIикурличил чарухъун ва гьачамалра пашманхIейуб.

Юлдашунала хьардаилихIедаили калунти суалтас ва мискьилладила хIеранас илини жаваб лугулри, сай хIяблизи рухъеси рурсиличи хъайчикайъниличила ва сунела талихI баргниличила.