ЧевяхIсилис бегIлара хIейгуси
(бехIбихьуд 5,6, 8 – ибил номертазиб)
3) Магьар кабушни хIярамси манзил
Ил манзил саби хьунул адам хIяйзлариубси замана. Сен хIярамси? СенахIенну шаригIятли хьунул адамла ихтиюрти далтахъухIели, ва ил манзил магьар кабушалли гIиддала замана бухъянбилтIуси саби. Амма хьунул адамли муруйзи магьар кабушахъес тIалаббиралли, илхIели къадагъабарибси ахIен, сенкIун илини балу-балули ил бирули сари.
Илкьяйдали декIарбикес асубируси ахIен хьунул виштIасилис раэс асубируси манзил. Муруй магьар кабушалли ва илхIели хьунул виштIасилис раили риалли, ил пашманвирар, ва иличибли сунесра хьунуйсра вайтIа биэс асубирар. Амма хьунул виштIасилис раили риъни балули биалли, декIарбикес хIярамси ахIен ва ил халбируси саби.
ДекIарикес илкьяйдали асухIебируси саби сагъхIейэсли зягIипикибси муруйс сай вебкIили гIергъи сунела букьурла мас хьунуйс хIебикахъес кьасличил декIариркалли. Лерилра чедир гьандушибти тяхIуртазиб магьар кабушес асухIебируси саби, декIарбикалли магьар кабушни халбируси саи, амма мурул адамлис бунагь биуси саби.
4) ХIейгесилизи халбируси саби (карагьатси) багьана агарли декIарикни.
Гьаман хьардиути суалтас жавабти
КепхIели магьар кабушни халбирусив ибси суайс жаваб лугули, халбируси саби. СенахIенну держ хIярамти диъни балули илди держни багьандан. ДекIарси саби илизи гужли держ держахъили ва илхIели магьар кабушили виалли, илхIели халбируси ахIен. Илкьяйдали операция барибхIели наркозла асарлиув виаллира халхIебиру.
Хьунуйзи «ХIу кяфир сарри» ибхIели магьар кабушибси бирусив?
Муруй хьунуйзи «ХIу кяфир» или буралли «Баркалла хIебалуси» ибси мягIналичил, илхIели халбируси ахIен. Эгер «ХIу кяфир», «Бусурман ахIенри», «ХIу диннизир ахIенри» ибси мягIналичил биалли, магьар кабуршуси саби.
Мурул декIариркухIели илала нигет халбирусив?
ГIяраб мезлизир «сарих» ва «кинаят» мягIнала дугьби лерти сари, магьар кабушни кIел бутIаличи буртIути. Цаибил – нигетла гIягIнидеш агарти тIалакьла дугьби сари: «ХIу декIаррикибсири», «Нуни магьар кабуршулра» ибти. Илди дурили гIергъи, нигетлизиб мягIни лебси ахIен, илди масхаралис дураб яра гьимукIили дурибти диаб, магьар кабуршуси саби.
КIиибил саби – «ХI удила хьунул ахIенри», «Рукьен нешличи», «Нуни хIу ратиулри» ибти мягIнала дугьби. Илдигъунти дугьби дурухIели нигетла мягIна баянбарес гIягIниси саби, се кьасличил дурибтил.
Муруй хьунуйс ца тIалакь бедили, гIур гьарахъли узес чумал базлис арукьялли, илдас магьар сагабарес гIягIнисив?
Эгер гIиддала манзил ил чаррарили виалли, ил илала хьунулли кавлуси сари. Эгер гIиддала манзил арбукьи гIергъи ил чаррарес дигалли, гьайгьайрагу, илини магьар сагабарес чебиркур.
Муруй хьунуйс декIарбикили гIергъи се-биалра бедес гIягIнисив?
Эгер муруй ца яра кIел тIалакь дедили виалли, гIиддала манзил арбукьяйчи хьунул сунела харжаначил хIеррарес гIягIниси саби. Рахли мурул декIарикили виалли, магьар кабушили гIергъи мутъат бедес гIягIниси саби. Ил саби багьа лебси сегъуна-биалра секIал. Мутъатла кьадар кIелрали барх кабилзахъуси саби, амма гIяхIсилизи халбиру 30 дирхамла кьадар (100,8) арцла граммличиб камли хIебиэсли ва гIядатлибиубли бузахъуси магьарла масла байхъайчиб имцIали хIебиэсли. Илдала ургаб жал акIалли, мутъатла кьадар имамли кабилзахъуси саби.
Асубирусив хьунуйс сунела магьар кабушес?
Эгер хьунуйс мурулли магьар кабушахъес ихтияр бедалли, илис асубируси саби магьар кабушес. Амма илини мурулла гъайла гIергъи итмадан ил барес гIягIниси саби.
Ахирличиб мурул адамтази ва хьунул адамтази бурес дигулра, цаличи ца сабурличил бирахъес, чула хIял-тIабигIятла декIардеш кьабулбирахъес ва цали цала иргъахъес. Ишар гьанхIедушибти гIуррара дахъал масъулти ва тяхIурти лерти сари адамтала хъалибаргуназир къаршидиркути, илбагьандан илди гьарилти декIарли хIердарес чебиркурилди аргъахъес вируси имамличил.
Бара гьимдукIибмад цаличил цала бархбасуни къябаэс къалабамадикIудая ва цала цали кьадри-кьимат убяхIмабиридая. Паргъатли, гьар шайчирад пикридухъи хIушаб кьабулагарси суал арзахъес хIурматчевси имамличи дугьадизирая. ХIушаб гьар хIяйчиб сабур булгулра. ЧевяхIсилис бегIлара хIейгуси барес къалабамадикIудая! ЧевяхIси Аллагьли ﷻ мяхIкамдарабая. Амин.
