Динани-ургабси жагьилтала мажлис
Гьалабван, майла 18 – личибад 23 – личи бикайчи Хайдакьла районна, Родниковый шилизибси дурхIнала арадеш къулайбирнила «Огонек» лагерьлизиб халкьани ва динани-ургабси, жагьилтала IX – ибил мажлис бетерхур.
Балбуцла мурад саби динани-ургарти, халкьани-ургарти бархбасуни цIакьдарни, жагьилтас ва чеалкIуси наслулис бархьси динна бяркъ бедни, миллатчидеш агардарили, даршудеш ва узидеш чIумадирнила тяхIурти далдуцни.
Мажлис ибхьнилизир бутIа-кьяндеш дариб «ДР-ла муниципалитетунала багьудлумала Советла» Ассоциацияла Председатель, Хайдакьла районна бекI ГIялим Темирбулатовли, ДР-ла Правительствола Председатель Рамазан ЖягIпаровли, ДР-ла миллатла ва динанала къуллукъунала шайчивси министр Энрик Муслимовли, МяхIячкъалала ва Грозныйла архиепископ Варлаамли, ДР-ла Муфтийла кумекчи МяхIяммадрасул Саадуевли, Россияла ФСИН-на жамигIятла Советла член, низам-кьяйда далтахъути учреждениебачил барх бузнила жугьутIунала цахIнабикла Федерацияла Департаментла руководитель, духIнарти цIакьанала бекIливиубси раввин, Россияла бекIливиубси дявила раввин Гуревич Аарон Юрьевичли, Калмыкунала бекIлибиубси динна буддизмла киласа «Геден Шуддуп Чой Корлинг» организацияла бекI администратор, Калмыкияла жамигIятла палатала член, буддизмла цахIнабикла вице-президент Сергей Киришовли ва регионтала гьарил даражала жагьилтани.
Балбуцла дазурбазив Дагъистан Республикала БекIла шайзивад саламтала дугьбачил гъайухъун ДР-ла Правительствола Председательла заместитель Рамазан ЖягIпаров. Илини сунела дугьабизлизиб буриб, мажлис республикалис дебали мягIничебси биъниличила ва динани-ургарти бархбасуни гьаладяхI дашахъес ва цIакьдикIахъес халаси пай кабирхьули биъниличила.
«ИшбархIила замана дунъя барсбиубли саби, Россияла дазурбачиб паргъатдеш агара, ва миллатчидешличи къаршиси Украинализиб бетурхуси дявила хасси операцияли жамигIят цабиахъес багьандан чеимцIати къайгъни дакIударес гIягIнили сари. Западла улкнани миллатчиби ярагълабирули, нушала улкаличи къаршити къадагълуми далахъули саби - илди лерилра дурадуркIути сари Россия цIакьагарбарили, чус мутIигIбарес багьандан. БусягIятла манзил лебил Россия миллатла гьавкьянас-алав цабиубли, цIакьбикIни жагьилтани бегIлара мягIничебсилизи халбирули саби», - викIи вице-премьер.
Илкьяйдали мажлисличиб гъайбухъун МяхIячкъалала ва Грозныйла архиепископ Варлаам, суненира дунъяла башри барсбиъниличила бурибси; ДР-ла Муфтийла кумекчи МяхIяммадрасул Саадуевли буриб, Западли, сагати цIакьаначил динна, адаб-хIяяла ва рухIлашалти хьулчни агардарес дигули дебали урехилати дугьабизуни тIинтIдирули биъниличила; Россияла бекIливиубси дявила раввин Аарон Гуревичли гьанбушиб, Дагъистан тарихлизибад Хазарла каганатлизи кабурхуси биъниличила ва илаб лерилра динанала вакилти уржили хIербирниличила, Западла улкнани биалли, къалмакъарра, бижгурдешра, пасаддешра тIинтIдирес даимбиубли саби или; Калмыкияла буддизмла бекIлибиубси организацияла вакил Сергей Киришовли буриб, лебил диннизибти адамтала талихIличи гьуни ца саби: сахаватдеш, адаб-хIяя, сабур ва балга-дехIибала или.
Нушала улкала динна вакилти цаси пикриличи бакIиб: цабиънили, цIацIати бархбасунани ва уржибдешлицун даршудеш мяхIкамбарахъес имканбикIахъниличила, дурабадси урехилис къаршидеш дирнила ва духIнарти масъулти сархибдешуначил арзес бирниличила. Мажлис нушала улкала хъархIерагардеш мяхIкамбарес ва узити республикабала даршути халкь батахъес багьандан Украинализиб бетурхуси хасси дявила операцияла манзил дурабуркIуси саби. Ил багьандан илдигъунти тяхIяр-кьяйдализиб, лебилра жамигIятунала динна вакилтачиб чебси саби, чула къяяни цIацIадарес, зиддешуни хъумартурли, пачалихъ гIеббуцес ва гьатIира уржили барх бузес.
Мажлисла программализи кадерхурлири спортла хIязани, конкурсуни, тренингуни, терроризмализибад мяхIкамдеш бирниличила семинарти ва дахъал цархIилтира далдуцуни. Ахирличиб цалабикибтас концертла программа гьалабихьиб.
