БекIлибиубси – дехIибала дирни
БекIлибиубси – дехIибала дирни
– ГIергъиси замана гьаман бикьули вирус «шайтIунтала виубли, шайтIай зягIипикахъили, гIяшикьбиубси шайтIай руцили...» ибти дугьби. Илди ца ити дурути гъайлизи халдаресра вирхIейрус, сенкIун дила хIулбани нуни гъамли балути адамтира бархли дебали барскабирули чебиулра. Илгъуна хIебиахъес багьандан се барес вируси? Сегъунти тяхIурти далдурцути шайтIунтазивад верцес багьандан? Се бучIалли гIяхIси мяхIкамдеш барес багьандан?
– Марлира, гIергъиси манзил шайтIунтани инжитбирути бахъбаили саби. Илдазибад мяхIкамдеш барес багьандан, бегI гьалабси яргализиб лерилра фарзла шудехIелра дехIибала дирес, исламла кьанунти дузахъес ва шаригIятли къадагъабарибси хIебирес чебиркур.
Гьайгьайрагу, бегIлара мягIни-черти – дехIибала сари. Илди дируси адам чIумаси къалализив кьяйда мяхIкамварили вирар. Илкьяйдали дехIибайс гIергъи дучIути азкартанира.
Жиндразибад зягIипти сагъбирути специалистунани бурни хIясибли, илдазибад бахъалгъунтани дехIибала дирули ахIен.
Багьес гIягIнибиркур, жиндри ва шайтIунти тIинтIдируси манзил бархIехъ-дугила манзил cаби. Илди имцIаливан дирути сари нясдешуни лерси мерличир, хIямамтазир, хIяжатханабазир, хIяйванти кайути мераначир. Илди мераначи вашухIели, гьаман «АгIузу биЛлагьи мина шшайтIани рражим» бучIес гIягIниси саби. Илкьяйдали Аллагьла Расулли ﷺ илди анцIбукьуназиб маслигIятбирули саби зикруби ва балга-дугIя дирахъес.
ВасвасикIухIели, ЧевяхIси Аллагьлизи ﷻ кумек тиладибарни, мяхIкамвирути Дурхъаси Кьуръа хасти сураби ва аятуни: «Аят -уль-Курси», «Аль– Фалакь», «Ан-Нас»-гъунти дучIни.
Идбагли ﷺ бурибсири, кайхьес гьалаб, някъбира гьала дуцили, делчIеная «Ал-Фалакь», «Ан-Нас», «Аль– Ихлас» ва лебил кьаркьайчирад хIяйна някъби хIяршдарая или. Илкьяйда барес вирар чули белчIес хIебирути биштIатасра.
Дигеси саби сура «Аль-Бакьара» бучIни, хаслира, гIергъити кIел аят. БелчIес къиянни биалли, дугели илала аудио алкахъи лехIяхъес вирар.
ХIядислизиб бурили саби ил сура бучIуси хъули шайтIан абиуцIуси ахIен или.
«Аль-Муъмин» сурала цаибти хIябал аят дучIес вирар. Гьаман бучIес «Ла илагьа илла Ллагь вахIдагьу ла шарика лагьу лагьул мулку ва лагьул хIамду ва гьува гIала кулли шайин кьадир». МягIна: «Аллагь ﷻ ахIенси цархIил агара гIибадат бареси. Ил Ца сай левси, агара илала валликьяна. Ил гьар секIа ВегIбекI сай. Илисцун сари дезни лайикьти, Илини се-дигара барес вируси сай».
Илкьяйдали маслигIятбирули саби Аллагь ﷻ гьаман гьануршни, акбар бучIни, дазайчил виъни. Гьарил къадагъаласи секIайзивад гьарахъли виэс гIягIниси саби, хаслира беркайзиб.
Аллагьла ﷻ у «Бисмиллагь» ирес ахъдешличивад тIяхIулхъухIели, дуцIар шин чярхIдирухIели, хаслира дугила манзил, цIябси хъули айцIухIели, ванзаличи декIти секIал кадирхьухIели, яра лайдикIухIели – илди анцIбукьуназиб жиндрас зарал бетаэс бируси саби. «Бисмиллагь» ва «АгIузу биллагь» ибхIели илди аркьян.
Кайхьес гьалаб чедетаахъили мяхIкамвирути балгни, аятуни ва сураби дучIес гIягIнити сари.
ХIядисуни хIясибли шайтIунти ва жиндри дитIикIути сари адам берхIила ва дяхIцIила ургавхIели, ца кьяшличив дабриличил вашухIели, беркеси алгъай някъли букухIели, урхIла хьунуйчил цунухъунхIели, гьагьикIухIели. Жиндри хIеда-кIахъес багьандан, гьагьикIни тIашаэс хIейралли, мухIлиличи някъ чебуцес чебиркур. УкухIели, гьарил кесек кайсухIелира «Бисмиллагь» ирес.
Илкьяйдали чинаб-дирагара жихI кабалтес асухIебирар. ХIяжатханализи айцIухIели, умуси мерлаб бурес гIягIнибиркур: «БисмиЛлагьи Аллагьумма инни агIузу бика минал хубси ва хабаиси».
МягIна: «Аллагьла ﷻ уличил вехIирхьулра, я Аллагь ﷻ нуни ХIези тиладибирулра мурул адамла ва хьунул адамла жиндразибад берцуди».
Вархкья агарли гьунчи дурамадулхъадая, авлахъличи дугели ва хIушацун мадашудая. ЦIябдиубхIели, биштIати кьакьала бархьмайидая, илхIели шайтIунти ва жиндри вяшдикIуси манзил саби.
Аллагьла Расулли буриб: «БерхIи гIелабикибхIели, я биштIати, я хIяйванти дурамайидая, маркIачIила манзил арбукьяйчи (бархIехълара дугилара ургабси дехIиба манзил). Марлира, илхIели берхIи гIелабикибхIели, тамай цIябдиайчи шайтIунти дурадулхъути сари.
Баралра шайтIан дакIубирнила ташмишдеш акIалли, «АгIузу биллагьи мина шайтIани рражим. Бисмиллагьи ррахIмани ррахIим» бучIеная.
Вайти муэрти чедиули диадалли, гIергъиси барни гIяхIси саби: «ХIяйна алгъай шайчи тударили, Аллагьличи ﷻ дугьадизеная шайтIа вайдешлизибад берцуди барахъес (хIяйна). БелчIи: «АгIузу биЛлагьи мина шайтIани рражим, яра «АгIузу биЛлагьи СсамигIиль ГIалими мина шайтIани рражим», цархIил шайчи шурухъес чебиркур. Тагьажжудла дехIибала дарая, чебаибсиличила чизилра мабуридая.
Аллагьли ﷻ бурибсири: «Гьарли-марли Набчи вирхуси адам шайтIунтани чеввалкIахъес хIе-дирар».
Аллагьли ﷻ мяхIкамдарабая.
