Имам Абу ХIамид аль-Гъазали
Мурул адамтани дузахъес гIяхIти адабуни
Мурталра хIела юлдашуначи ва хIед хIейгутачи разили вирен, илдала гьалав сезаманалра увяхIмайруд ва илдазивад урухмакIуд. Мурталра пикричевсили вирен, амма пахручевсили майруд. Гьар секIайзиб «мургьила ургала» бузахъен. ВашухIели алавчарли хIермайкIуд. Адамтала кьуькя чебаибхIели, илдала мякьлав вахъхIи тIашмалзад. Вархьли кайрен, някъбала тIулби малусахъид, тIулекаличил хIязтали меркьуд. Цулбазив ва къянкъубазив халтIмайкIуд, гьагьмайкIуд ва чIикьмайкIуд. Паргъатли кайили, аргъесли гъайикIен.
Ададамти хIечил ихтилат-бикIухIели гIяхIти дугьбачи лехIирхъен. ИлхIели хIела паргъатагардеш ва авараагардеш чемабаахъид. ГъайикIусилизи кIинайс дугьби тикрардарахъес тиладимайкIуд, масхуртачи пикри бяхIчимайид. Урши виаб рурси риаб хIед виштIаси гIяхIизниличила мабалахъид. Хьунул адамли кьяйдали къугъати секIал мадихид, амма лагъ кьяйдали умудешагарли ва авараагарли мавъуд. Гьар секIайзиб низам бузахъен. Кьаркьайчи дахъал рухьери ва гIявадеш пайдаламадирид.
Хабурти дурес дигниличи чекадмалзад. УрхIлизи мабалахъид хIела агиличила. Хъалибарг дигахъен ва илдачил кьяркьсили майруд. Илдазира гьар секIал гьаргхIедарили, мяхIкамбирен: хIела мискиндешличила багьалли хIу увяхIварес асубирар, хIела халаси давлаличила багьалли дахъал тIалабдарес асубирар. Илдачил гIяхIил вирен, амма хIела кIантIидеш чемабаахъид.
Чичи-биалра гIяйиб бирадли, къалабамайкIуд ва далилти хIядурдара. Някъбани дебали гьакIмайкIуд. ГIясидеш арбякьунхIели ахIи гъаймайкIуд.
Эгер хIед бекIдешдирусиличил гъалмагъдеш дузахъес чебикалли, иличи дебали гъаммайруд ва ил хIела душман ветхIерар ибси бирхауди бати. Иличил гIяхIли ва кIантIили вии дурхIначил кьяйдали. ХIед бакьес дигусицун илизира бура. Ил хIела пикриличи лехIихъули виалли, илала хъалибаргла, биштIатала ва гъамти адамтала урга камалзад.
ХIела гьар секIал гIяхIси заманацун хIечи башути гьалмагъуни гьарахъли бати, сенкIун илди душмантази халбирути саби.
ХIела хIурмат-кьимат давлаличиб ахъли камабалтад. Адамтала гьалав тумайкIуд. ХIела тянишлизи хIела къияндешуначила мабурид, хIела кIанIидеш чебаибмад ил хIечи варсирар.
Духути адамтачил масхурти дати, илди хIечи гьимбукIес асубирар. МехIурти адамтачилра масхурти дати, илдани лайикьагарси секIал бурес асубирар. Масхуртани адамла кьимат камбирар, ил увяхIвиру, урези беткайхъахъу, пашмандешличи левку ва диги агарбиру. УркIи бубкIахъу ва ЧевяхIсиличивад гьарахъиру, вайси пикриличи гьуни ибхьу, гIяхIти гьанбикуни дулъахъу, бунагьуни имцIадиру, балтIнилис, нукьсандешуначиб ва хатIабачиб чебдукарбирхIнилис сабабли бирар.
Нуша Аллагьлизи ﷻ дулгулра нуша бархьси гьунчи кадизахъес, ва тиладибирулра Илини нуша бархьси гьунчи кабизуртала урга кадатахъес. Нуша тиладидикIулра арадеш бедахъес, ва арадеш бедибтала урга кадатахъес. Нушани Илизи тиладибирулра Сунела шапагIятлиу дуцахъес, цархIилти буцили кьяйда.
Нуша тиладидикIулра Илизи Сунени нушаб гибсилизи баракат кабихьахъес ва Сунени нушаб кьадардарибти вайдешуни гьарахъдарахъес. Аллагь ﷻ ахIенси цархIил агара нушачирад Сунени делкIунти гьарахъдарес вируси. Илала душманти ахъхIебирар, илкьяйдали убяхIхIебирар Сунени Сунеш юлдашли декIарбарибти.
ЧевяхIси сай нушала Аллагь! Нушани Илизи чевверхни тиладибирулра ва Илала гьалар дарибти бунагьуначи пашмандирулра.
Нушаб дигулра дахъал пергерти саламти дурес Илала лагълис, МухIяммад Идбаглис ﷺ, илис гIелабад арбякьунти асхIябтас, чулира хIекьдешла хьулчи кабихьибти!
Лерилра дезни ца Аллагьлисцун ﷻ сари! ЧевяхIси Аллагьли ﷻ Сунела уркIецIи баахъаб МухIяммадлис ﷺ, нушала Идбаглис ﷺ я учIес, я лукIес хIебалуси. Амин.
