ГIяхIбаркьла фондла бузери
Северный Кавказлизиб бегIлара халаси Дагъистайзибси гIяхIбаркьла «Инсан» фондличила нушани газетала бяхIяназиб чуйнара гьанбушира.
ГIуррара иличила чуйна белкIалра, ил жамигIят-ургаб гьарлимарли халаси кьадри-кьимат сархибси фонд саби. Лебтанилра чебаибсири, коронавирусла чейхъуси изала тIинтIбирухIели, адамтас кумекбарес фондли сецад хIяракат барибал. Больницабас ва тухтуртас фондла хIянчизартани гIеббаахъибси кумекличилара нушани бурибсири. Кьурбан Байрамла манзил Сулайбан Керимовли дархьибти мас шимирайонтази даахъибтири ва дахъал илдигъунти гIуррара далдуцуни дурадеркIибтири нушала республикализирцун ахIенну, цархIилти регионтазирра.
ГIергъити бузразиб фондла бузерила чебкад МяхIяммадрасул ГIяхIмадовличил дила ихтилат бетаур:
– «Инсан» гIяхIбаркьла фонд нушани пикрила дураб балтуси ахIен. БусягIятла замана хIушала бузериличила къантIли бурили дигахъира.
– Пандемияла манзил фондли 300 тонна берк-бержла продуктунала дутIибтири, бегI гьалар зягIипти, ятимти лебти ва ца нешлицун дурхIни абилкьути хъалибаргуназира бархли. Илгъуна кумек нушани даимбирутира. ДР-ла БекIла хIукму хIясибли, республикала бюджетлизирад арц декIардарибтири пандемияла манзил зараллизи бикибтас кумекбарахъес. Илди 4 миллион 130 азир къуруш арцла бузерила Министерстволизирад фондличи даахъес гьалабван вягIда бигьунра. Баркалла багьахъес дигулра Василий ГIябдугIялиевичлис, нушала хIянчи кьиматлабарили, нушачи игьдибар бихьили кумекбарнилис.
– ХIушала хIерудилиуб ахIенти, бегI гьалаб фондлизи дугьабилзути адамти секьяйда бакIес гIягIнити?
– ДугьабизурхIели, бегI гьалабси яргализиб адамтала документуни диэс гIягIнити сари, илди-ургар изала кабизахъни марбирути документунира дархли. КIинайс нушани илдачи инспектор урхьуси сай, илдала гIямрула шуртIри ахтардидарахъес, гьарли-марли къияндикибтил ахIенал багьес багьандан. Васвасъала кавлули диалли, мякьлаб хIербирути унрубази яра тухумтази хьарбаудра дурабуркIуси саби. Нушачи гIярзадугьабиз белкIи гIергъи саби нушани илдас кумекбируси. Илгъуна тяхIяр бузахъуси саби, сенкIун фондла кумек мискинтачи ва гьарли-марли кумекличи хIяжаттачи баахъес багьандан.
– ХIушани гьар журала кумек гIеббиахъулра: Хъулри цIали дигубли, гъятIдиили яра цархIил бехIемцI бетаурли хъалч агарли калунтасра бархли.
– ГIе, нушала фондли беркбержла продуктуначилцун ахIенну, зягIиптас гIягIниси журала операцияби дурадеркIахъесра, хъали агарли калунтасра бархли кумекбируси саби. «Ну – кьайгим» бикIуси программара бузуси саби. Спонсортани чучи пулан ятимличила, хъалибаргличила яра цунси адамличила хIеруди чеасили, къелгIеббикути саби. Илкьяйдали хъулрира тIашдатес, асахъес яра сагадарахъес кумекбирути спонсортира лебти саби ва халкьли дучибти арцра дедлугути сари. Хъулри илди адамтала вегIдешлизир кавлути сари.
– ИшбархIилис сегъунти хIясилти каилрая?
– Фондли арбякьунси дус барибси кумек 100 миллионничирад бухъи саби. Ила кадурхути сари: арцличил, берк-бержличил, медицинала шайчибси, хъулри исухIели ва далдирухIели дарибти харжанира. 11 хъали адамтала вегIдешлизи дедибти сари, цIали дигубтас, ятимтас ва цунти адамтас. ХIера илкьяйдали дузутира нуша. ХIушаб биалли баркалла нушала хIянчиличи пикри бяхIчиаили, чихъси кьимат кабалтнилис. Арбякьунси базличир «Инсан» фондли чула хIерудилиубтас 75 тонна берк-бержла масани дутIиб. Дагъиста лерил районтазиб фондла филиалти лерти сари. Саби гIяхIъулатани ва жамигIятла хIяракатчибани 3500 хъалибарглис берк-бержла масанала тIакьни даахъиб. Ца адамлис хасбарибси тIакьализи кадурхути сари: 5 кило бетIула, 1 кило чакарла, 1 кило макаронтала, 1 литр маслала, 1 кило гречкала, 1 чяйла тIакьа. Кумек гIеббиахъуси саби хъалибарглизибтала лугIи хIясибли.
Фондла генеральный директор М. ГIяхIмадовли бурни хIясибли, заманалис Дагъиста БекIла къуллукъуни дузахъуси С.Меликовла хIукмула къадагълумала низам-кьяйдализи каберхурти адамти саби имцIали хIерудилиу буцибти. Ноябрьла 3-личибад бехIбихьили, 65 дусла чедибти, хургьрала, уркIила-тумала дахъхIила излумачилти адамти мяхIкамли биэс гIягIнити саби санитарияла ва эпидемиологияла шайчирти тяхIяркьяйда ункъдиайчи. Ил багьандан ил журала адамти фондла сияхIла бегI гьалабси яргализи кабурхути саби. ГьанбиркахIе, «Инсан» фонд ахъти шабагъатуначи лайикьбикибсири: «Чебла ва адамдеш» медаль, Россияла Президент Путинна медаль дедибтири.
Фондлизиб бузути жавабкардешличилти, адабчебти, гьарли-марли адамтачи уркIи изути, жамигIятла гIямру ва яшавла даража ункъбиахъес лерилра цIакьани дяхIчиаибти адамти саби. Чула бируси хIянчилизиб мурталра гьалабяхI башаб, сархибдешуни диаб ва кумекбарес музабулхъути адамти бахъбикIаб. ЧевяхIси Аллагь ﷻ чучи разили калаб. Амин!
НАИДА ГЪУРУЕВА
