Аллагь ﷻ уркIилавси адам сай давлачевси!
Аллагь ﷻ уркIилавси адам сай давлачевси!
УркIила малхIямдеш, ряхIмучевдеш, адамдеш – «гIяхIбаркьла баркьуди» ибти дугьбала духемличи гъамтили детарули сари.
Селичилра хIерхIеили, цархIилтас кумекбарес гьалакти адамти бирутири сезаманалра. Илди халаси хIурматличи лайикьтира саби, сенахIенну машгьурдеш яра халкьла кьимат сархес ахIен илдани гIяхIбаркьла баркьудлуми дурадуркIути. Гьайгьайрагу, нушала республикализиб мурталра бирутири ва гьаннара леб уркIи гьаргти, кумекличи музабухъес хIядурти, культура, гIилму, медицина ва цархIилти кьялуби гьаладяхI ардукес къайгъни дакIудирути адамти. Хайдакьла районна Сурхачила шилизивадси МяхIяммадрасул Юсупов сархибдешуначил гьалавяхI вашес дигуси адамлис кумекла някъ гьабуцес даим хIядурли сай. Гьар дус апрельла 13-личиб дурабуркIуси Баркаллала БархIила байрамлис гьалаб адаблашалти къиликъуначилти МяхIяммадрасул Рабазанкьадиевичлис баркалла багьахъес дигулра. Иш белкIла игитла тухумтани бурни хIясибли, алавти адамтас кумекбирис ибси хьул илала уркIилизиб виштIахIелил акIубсири. БегIтани уршилизир бархьдеш дигахънила, децIра разидешра дарх дуртIнила, ряхIмучевдешла, кумекличи музаулхънила къиликъуни адикьур. ХалаваибхIели диахъубти сархибдешунани цагьатIи мягIничебси къиликъ акIахъуб – сахаватдеш.
Сахаватдеш давлала хьулчилизи халбирусири жявхIелила пасихIкартани. Гьайгьайрагу, ил ЧевяхIсини бедлугуси хасият саби. Сахаватдеш гьарил адамлизиб бируси ахIен. МяхIяммадрасул Юсупов школализив учIухIелира цархIилтазивад декIарулхъусири. Дарс батурли къалабали арукьес хIяжатбикибси мугIяллимла тилади хIясибли, М.Юсуповли халаси рузила класслис дурсри кадихьибси анцIбукь бархли биубсири. Буралли школализив ил дебали ункъли учIусири ва чедирти классунала дурхIнас буланра кумекбирусири. Буйнакъсклизибси школа-интернат мургьила медальличил таманбарили, МяхIяммадрасул Рабазанкьадиевич Саратовла политехнический институтлизи керхурсири. Вуз ункъли хъараахъурси жагьси специалист, машинабала гьундури лушес Сургутлизи арякьунсири. ВахъхIи инженер-строительли, лушнила мастерли, кIинайс прорабли, производствола отделла начальникли ва «Запсибдорстрой» трестла 108-ибил машинабала колоннала бекIливиубсигъуна инженерли узули, халати устадеш касиб ва бузерила ахъанайтачи ваиб. Сургутлизирти аргъ-бархIиличи хIерхIеили, 1991 ибил дуслизив М.Юсуповли гьундури лушнила «Автодорстрой» фирма акIахъуб ва илис бекIдеш диран ветаур. Фирмалис ит манзил улкализир кадикибти лерилра къияндешуни чекасесцунра ахIи, хIянчила мерани мяхIкамдаресра имканбакIиб. «Автодорстрой» ЗАО самолётуни урцахъуси ва кадиръахъуси, транспортла ва мегьла гьундури, гумурби лушнила, илди лутIихьулчиличирадал сагадирнила хIянчи дурадуркIули, бузули саби. МяхIяммадрасул Юсупов гьундури лушнила шайчивси бегIлара гIяхIси специалистлизи халирули сай.
Илини сабри бегIла гьалаб мегьла гьунила шайчирти катругти бяхIяни чIумадирахънила хIекьлизирти тяхIяр-кьяйда пайдаладарахъес ибси пикри гьалабихьибси, илкьяйдали техникалашалти цархIилти сагадешунира. М.Юсупов пасихIси, серхурси ва гьалавяхI вашуси адам виънили илала фирма регионнизиб гьабкьясили бетаур ва улкала бегIлара гIяхIти предприятиебала лугIилизи каберхахъур. ХантыМансийскла автономный округ – Юграла хIурматла строитель МяхIяммадрасул Рабазанкьадиевичла хьулчилибиубси бетуц саби – хIянчила даража. Ил чекайзурси ва жавабкардеш дихуси адам сай. М.Юсуповла сахаватдешли ва уркIила малхIямдешли лебилра хIяйранбирахъули саби. Гьайгьайрагу, сунела шантала гIямру гIяхIдухъахъес хьуликIусири ил. БугIярси Северлизир делшунти гьундурани ил ахIерти мер-мусаличи, ванаси Дагъистаннизи викулри. Челябкьлализибра илала гIяхIбаркьунас гьатIиралра бахъал адамтани баркалла балахъниличи рирхулра.
Шантала тилади хIясибли М.Юсуповли 12,5 километрла бухъяндешличилси Мажалис – Сурхачи гьуни белшун, илкьяйдали гьунила дубларти гIинзурбира къулайдариб. Сай акIубси шилизир сунела харжаначил мижит, хIямам ва шила хIябразиб дехIибала дируси юрт делшун, хIябри къаркъубала хIярили алавдуциб ва мегьла унза даршиб. Шантала юртанази газ ва дужути шин дукиб. Хайдакьла районна бекI ГIялим Темирбулатовличил бархси проект хIясибли, Сурхачила шилизиб Интернет кабизахъур. Алавти шимала халкь буланра Интернетличил пайдалабикIули саби. М.Юсуповли сай акIубси шилизиб 100 дурхIялис хасбарибси школа ва спортзал тIашдатахъур. Илди гьаннала заманаличи далдикибти гIягIниахълумачил гIердуцили сари. Школала азбарлизиб биалли, ЧебяхIси ВатIа дергълизиб алхунти сурхачилантала хIурматлис памятник кабизахъур. МяхIяммадрасул Рабазанкьадиевичли 15 дусличибра имцIали школала мугIяллимтас гьар баз алапабачи чеимцIабарибси арцла кьадар бурхьули сай, сай шилизи вакIалли, Даргала театрла, делхъ-далайла «Дагъистан» ансамбльла, районна культурала гIяртистуни жибарили, шадлихъуни дурадуркIу ва шанти разибиру. Илала дурабад, М.Юсуповли шантазир спортличи, арати гIямру дуркIниличи диги адилкьули сай. Ил сунела дудешла, ДР-ла шила хозяйствола хIурматла хIянчизар Рабазанкьади Юсуповла хIурматлис дурабуркIуси «Сурхачила кубок» бикIуси волейболла абзла спонсорра сай. Илала гIяхIдешличибли районнизир дурадуркIути абзани гIядатла детаур. МяхIяммадрасул Юсуповли сунела шантасцун ахIен кумекбируси.
Табасаранна районна Дюбек шилизиб Надир-шагьличилси дергълизиб алхунтала хIурматлис памятник кабизахъес арц декIардариб. Илкьяйдали «Дагъистан» ансамбльлис, концертуначил башахъес багьандан, гIяхIти шуртIрачилси автобус пешкешбариб. Илала гIяхIти баркьудлуми нушала шагьарлизира даибти сари. Даргала театрла директор МяхIяммад ГIябдулкьадировли буриливан, М.Юсуповли театрлис халаси кумек гIеббаахъибси саби. «МяхIяммадрасул – сунела миллатла искусство кьиматлабируси, ВатIан дигахъуси ва гьарли-марси мурул адам сай. Арцла кумекла дурабад, илини нушала халаси хIурматра бируси саби. Гьарахълав виъниличи ва хIянчурбази вархибдешличи хIерхIеили, 2019 ибил дусла февральла 27-личиб сагабарибси театр ибхьнила балбуцличи вакIибсири. Гъайлис марси виъни багьандан, шантас гIибратли ветаурси МяхIяммадрасул Юсуповла нушанира халаси хIурматбируси саби ва цIали бигубси театрла Юрт сагабирнилизи илини кабихьибси белгиси пайличила нушани хъумуртуси ахIен! СенахIенну, илала гIяхIдешличибли саби сагаси сценаличибад театрла гIяртистунас хIербикIантас разити хIялани пешкешдарес имканбикIусира», - викIи М.ГIябдулкьадиров.
Дила белкIла игитлис баркалла балахъули, даргала гIяртистунани пергер далуйти дучIули сари. М.Юсупов мурталра гIяхIлас разили гьунивиуси, къугъати гIяхIялдеш дируси, уркIи гьаргси, дяхI шаласи адам сай, илкьяйдали пергер хъалибаргла бекIра, дудешра, хала дудешра сай. Даргантала «Дурав – берхIи, хъулив – гъагул» ибси бурала лебси саби. МяхIяммадрасул Рабазанкьадиевич илгъуна адам ахIен, илини тухумти сунела уркIила малхIямдешла нурли ванабирули сай. Избербашлизибси «Дагъистанна бегIлара шаласи юртли» сабси ДГУ-ла филиаллизибра М.Юсуповличи даим хIерли бирар. Вузла директор Шапи ГIялиевра МяхIяммадрасул Юсуповра бахъхIила юлдашуни саби. Илди Буйнакъскла школализиб барх бучIули калунтири. Ш.ГIялиев 2019 ибил дуслизив вузла директор ветаурхIели, М.Юсупов сунела цакласслан гIевуцес вакIибсири ва студентуналара преподавательталара гьунибаъниличир бутIакьяндеш дарибтири.
ИтхIели МяхIяммадрасул Рабазанкьадиевичли Шапи Изиевич чеветаибси адам сай ва илала бекIдешлиуб вуз гIяхIцадла гьалабяхI аркьян или бурибсири. Илала гъай дархьти диънилис нуни бикьридеш дирулра. М.Юсуповла гIяхIдешличибли Дагъистанна бегIлара хIурматла вузлизиб багьуди касес набра имканбикIули саби. ХIурматла МяхIяммадрасул Рабазанкьадиевич! ХIед халаси баркалла балахъули, иш макьала лукIулра. ХIу арали кали дигути адамтала балга-дугIя ЧевяхIсини кьабулдараб! ХIуни адамтас бируси гIяхIдеш Аллагьли гьатIира имцIабиахъубли, хIечи чарбулхъахъаб! Писатель-сатирик М.Задорновли буриливан: «Дахъал арц лерси ахIенну, Аллагь I уркIилавси адам сай давлачевси. Дахъал арц лерси виалли – кагъурти учидирхъуси адам сай». ЦархIилтас кумекбирнилизиб саби адамла гьарли-марси талихI, мас-хазна бурчнилизиб ахIенну.
Избербашлизибси ДГУ-ла филиалла юридический факультетла студентка
МАРГАРИТА АРСЛАНБЕКОВА
