Вершала хIяб
Вершала хIяб
Хала БархIи савли, шила лебилра жамигIят хIябрачи кьулгьу барес цалабикилри. Шила кьадини балга-дугIя дарили, тамандиубмад, лебтанилра чула гъамтала хIябрачи гъамбиубли, кьулгьу-алхIям дучIулри. Муслим сунела нешла хIябла мякьлав тIашизурли левли, кьяшмаубси ванза сагали биркъубли биъни хIясиббариб.
ГIяхIил хIеризурхIели, ил биштIаси хIябличи мешубиркулри, ца дубличи биштIаси къаркъа бархли кабихьилри. Ил секIай Муслим левгIев тамашавиахъуб ва алав хIеризургу, цархIилли ил секIал хIясиббарибал или, амма лебилра ца мерличи цалабикилри. Садакьа бутIес балбизурти шила жагьилти, пакетунира сабира кабиибти биштIа-халати лебихIи арбякьун.
Садакьа бутIили таманбиубли гIергъи, лебилра чула хъулрази гьайбиубхIели, Муслимли сунела унра ХIузайматличи гъамиубли, чебаибсиличила гьанбушиб. Илди гIуррара хIябрачибяхI гьайбиубхIели, чумал адамра илдас гIелабад батбихьиб, селис-биалра кумек хIяжатли бургар или.
- Иш хIябличи мешули ахIену? – викIар Муслим ила гъамбиубтази.
- Валлагьрагу, хIябличи мешудеш леб. Ил чили-биалра сунес хIяб хIядурбарахъес, мер чебаахъес или барибси хIянчи бургар, - викIулри МяхIяммад.
- Илкьяйда мер хIядурбирусини къаркъа кадирхьули дирар, ишди гIянжила биштIаси бекIа бусягIятал дягIли диркьбиругу, - викIар Муслим, - дила нешла мякьлаб наб хIяб лайикьли бири, дила пикри хIясибли.
Къаратли анцIбукь селизибал аргъиб. Санипат ил бархIи шантачил рарх хIябрачи хIеракIниличила гьанбикиб ва селра хIеили, илавадли арякьун…
…Чумал бархIи гьалав, дугила кьанси манзиллизив Къарат илди гьунила дубларти хIябрала мякьлавад шулумулхъулри. КьутIкьули рисуси хьунул адамла тIама аргъили, гьала-гьала урухиуб, гIур цIелдубала ургар ряхIудикарикили рисуси Санипатла къаралди хIясиббариб. Ил илини тIама хIясибли рагьур. Селра хIеили, Къарат илавадли, зайбикIули бучIескабиибси бекIра буцили, гьарахъикиб…
…Санипатла мурул бехIемцIлизи викили алхунхIели Дишар дусцунри виубси. Илизи дудешла агри хIебагьахъурли, Санипатли халаваахъиб, хъайчикатур. Дахъал гъай агарси ва сунечи хъарси бируси ил шантала уршби-ургав селизивадалра декIарулхъуси ахIенри.
ГIергъиси замана жагьилти муцIуртачил башескабиибхIели, Дишарлира гIежалагъуна муцIур сурбатурлири, амма супел бирсес хъумуртули ахIенри. Ил хьунуйзира цIудара палтарличил ва дяхI кIапIдарили рашен или къалмакъарли виркьулри. Хьунуйс илала гъай детIиб ва сунела бегIтачи аррякьун.
Санипатли сунела урши левгIев варсиъни хIясиббирулри. Ил нешличил камли ихтилатикIулри, мурталра телефонничил чизирил гъайикIулри. Чумал бархIи, чина вашулилра хIебурулри, хъули чарулхъули ахIенри.
- Се бетаурси, дила урши хIед, - рикIар Санипат ца бархIи илизи, - сен нешличи бекIлил гьавхIейкIулри? ХIела сегъуна-биалра изу-зугIяла леб биалли, нешлизи бура, кумекбирисну.
- Гьарил секIал ункъли сари, пикримарикIуд, - гъай къантIкадариб уршили.
Санипат Дишарла юлдашуначира дугьаризур анцIбукь селизибал багьес дигули, амма гIяхIдеш бетхIеур. Илдас Дишарличила гъайбикIесалра дигули ахIенри. Неш кьакьарикIулри, амма селра аргъес яра барес рирули ахIенри.
БазцадхIи урши чархIелхъухIели, Санипат иличи мурталра гьаввикIуси Вагьабличи рякьун. Илини халаси разидешличил хIела урши Сириялизи арякьи сай или нешлизи багьахъур. ИлхIели Санипатла хIулбала гьалабси дунъя цIудар-цIяббиуб, аргъала детахъили карикиб…
Сириялизи арбашутачила дурути гьандиркули, неш хъулирад дурарулхъес урузкIулри ва адамти цалабиркуйхIи хIерашес къайгъилизирри. Илкьяйдали ил шинничира дугели рашескарииб. Вагьабли ца бархIи иличи вакIили багьахъур, хIела урши шагьидла бебкIали вебкIили сай или. Санипатли ил къагъдеш чедакIибхIеливан, вяв-чIяррикIули дуравшиб ва аргъала детахъили карикиб. СецадхIи илкьяйда калунал суненира балули ахIенри, амма черсаргъибхIелира илала дагьри дамкьуртиванри, ряхIудирикили гIянайчи кьутIкьули симкьрикIулри…
Хъулир кьакьадешлизир руэс хIерирули, гьар дуги ил авлахъличи аррашули, ахъли рисулри. Гьачам дугила кьанси замана иларадли чаррулхъули хIябрала мякьла раибхIели, илис цIелдубала ургаб Дишарлара хIяб лебсиван гьанаур. ДуцIли хIябрачи ретухъун. Илис гьалар ил цIябдаибхIели хIябрала мякьларад шулумрухъесалра рируси ахIенригу. Иш гьакIлис илала селизибадалра урехи аги. Санипат цIелдубала ургарад дуцIрикIулри, амма уршила хIяб баргес рирули ахIенри… ГIур ряхIудирикили ахъли рисирииб ва някъбачил ванза икъескарииб. Илала цIум чекасес хIебиубли, неш-ванзара агьибикIесбииб… Нешанала тIамри дубуртала ва шурмала ургарра гIералгьутигъунтири. Илдала тIамри аргъибси заклира нургъби чяхIдухъахъун…
СецадхIи ванзаличир, къагъдешлизир калуналра балули ахIенри ремхIурли, хIялагаррикибси Санипатли черсаргъибхIели…
- Гьуя, шаладиркулигу, адамтани чериурагу, - или харчризур ил.
ГIергъила дугира Санипатла уркIи хIябрази гьуцIбикIулри, илар уршила рухI лертиван гьанарули бииши…
Илкьяйдали гьар дуги рашулри Санипат хIябрачи, яни-хIеб хIерикIули…
ХIили чяхIдикIахъули тIулбира някъбачил биркъубси ва бухIнаб селра агарси биштIаси хIябра сунела уршила сабхIеливан гьанарулри ил пякьирлис. Чуйна ила ракIалра дигIяй сунела уркIиларти дурулри:
- Итцадра къугъали айкьурси хIед се хIебиули, дурала улкализи арякьунсири? ХIу багьанданкIун нуни жан ахIерахIедарира, сен набчила пикрихIевхъунри? Чили чеввалкIахъунри-ри-и-и! – гIянжилизи бекI къужбарили, рисуси илала чIярла тIамали ванза мерсливан гардарбирахъусигъунари. Адамла уркIиларти мерс ванзалайчир гьатIира зугьати ва хъярхъти дираргу.
- Вершадеш даррив хIуни, верша урши вирусив? Ца бархIилра вегIла дурхъаси ВатIайс, айкьурси ванзалис, бегIти-шантас вершадеш дарибси хIу дигахъес хIериру-у-ус, - тIама хирбикIули хьалли, Санипат паргъатриэс рирули ахIенри, - гIур се чебаахъес ратурлира, дила Аллагь, рухI касахъагу дила, наб дунъя цIяббиублину, дила ахIерси ванзала михъирлизирцун паргъатриишану! Вай, хIу варкьиб аба ребкI, хIукIун дила диъра хIира сайри, илцад чеввалкIесил се сабаб бетаура?!
Иш хIяблав хIу левси виадри цархIил журала дииши дила бисара. Се или рисиша, хIела неш верхIна тIякьрухъ… УрхIла ванзаличиб хIяб кьалли хIебикиб бургар хIед. Багьдиубти хурани бергунара хIела итцад жагаси чарх! ХIу хIеркьибси риасри, ишцад кахси цIахдешра хIебиишигу, хIела нешлис ажал даъ….
