Бархьдеш
Гьачам хIябал урши вацIализи шадибгьуни барес арбякьун. Илар биалли бизити цIедеш, шайтIа кьапIни, жагати арцанти лерри, ва илдани заманаличила хъумартахъур.
ЦIедеш ва шайтIа кьапIни дурчули, арцантала вичIиръалаличи лехIирхъули, илди чеббулкIули хIилхIи калун. Хъули аркьуси кьяшла дякь баргайчи илдасра хабарагарли бархIи ахъиб. Илди хъули чарбухъес урухкIулри. «Гьанна диркахъу нушаб!» – бикIули илди гьайбиуб.
Хъули аркьухIели, гьуникад илди пикрибикIесбииб, се буралли гIяхIлил къяна буралли, яра бархьдеш гIяхIсил.
– Нуни бурис, – викIули сай цаибил урши, – набчи вацIализиб бецI чебухъун или. Дудеш урухвиубли селра хIейкIар.
– Нуни бурис, – викIули сай кIиибил, – хала дудеш къаршиикиб или. Неш разирирар ва къалмакъар хIедиру.
– Нуни биалли, бархьдеш бурис, – викIар хIябъибил. Бархьдеш бурес мурталра гьамадси саби ва селра пикрибирес гIягIнидеш агара.
ХIера, илди хIябкьяйличи баили декIарбикиб ва хъули арбякьун.
Цаибил уршили хъули чариубли бецIличила хабар бурес бекIхIейубли левалли, хIерикIалли мешебей лявкьули.
– Нушала диштIати вацIурбазир буцIи дирути ахIен, – викIар ил. Диаллира, бецI чебухъи гIергъи мажахIят хIу мицIирли я дяхъи-хъаслахIейубли илизивад верциши. ХIела биалли, биштIасилра дяхъи агара. Илкьяйдали илала къяна пужбиуб. Дудеш къяна бурниличи дебали гIясивиуб.
КIиэсил урши хъули ветибхIели, хала дудешличила хабар буриб. ИлхIели гIяхIладли вакIибси хала дудеш илдачи гьаргала дуравхъун ва илалара къяна пужбиуб. Нешли бархьдеш багьурли гIясириуб.
ХIябэсил урши хъули ацIибмад, нешла някъра буцили, гьар секIал дархьли дуриб. Нешли ил гьарахъли укьниличи разихIерикиб, амма бархьли бурни багьандан иличирад черрехур.
