Сахъти кьяцни
Кешли гIяргIнала пукьализи абацIили Дагъа бигIун ва таврализи кабатурли, хъар бигьун ва вацIализи хъусбариб. Дагъа вявбикIули, пялхъярбикIули, тIамали биркьулри. Кешли ил хъусбарили аркьухIели, илис муцIуртира гьакIардикIахъули ляркьути кIел Кьяца чедаиб. Илдазибад урухбиубли Кеш таврара лайбакIили кьадубази бебшиб.
Кьяцни ила гъамдиуб.
- Дагъаларив иш тIама? - хьарбаиб цали.
- Нунира бакьира, - бикIар цархIил.
- Эй, Дагъа, хIу чинабри?!
- Ну ишаб сабра... таврализиб... - жаваб чарбариб Дагъали. Берцахъабая ну, узби!
- Секьяйда хIу таврализи бикибсири?
- Ну бусухIели, тавра бекIличи чебушили, чилирил хъусбяхъира, берцахъабаягу, жан узби!
Кьяцни пикридухъун.
- Угьу... ХIебиалли, узи, тавра урхIла бетарули саби, - бикIар цаибил Кьяца.
- ГIе... Пикриухъес гIягIнили саби, узи, чизи-биалра хьарбаэс, - бикIар кIиибил Кьяца.
- НукIун бигIира, ил якьинни ахIену? - вявбухъун Дагъа.
- Ил тавра хIела биалри, нушани хIу цагьакIли илизибад дурабилтIари, илкIун урхIла саби.
- ХIебиалли ну Полканничи букаба! Илини иргъуну тяхIяр! - тиладибухъун Дагъа.
- Се леба ишаб хIергъеси? - бикIар цаибил Кьяца.
- Иличи букес селра агара. Эгер хьарбаалли, урхIла таврара хIушара чина аркьутира или... Гьа? - бикIар кIиибил Кьяца.
- ХIебиалли, Полканничи дякьи буралра бурая ну балагьлизи бикилра или, -тиладибухъун Дагъа, ну биалли таврализиб хIерли буус.
- Ил барес асубирар, бархьли буралли, нуша итадяхI ахIенра аркьути, амма хIу багьандан ил бирехIе...
Кьяцни ардякьун. Дагъа сабицун гьунчиб калун. Полкан дуцIли бакIили хIербикIалли Дагъа берцахъес, я тавра агара, я Дагъа агара...
