Редакциялизи кагъар

Редакциялизи кагъар

– Советунала улка бехъубли, гIергъити дусмазир нушала улкала Правительстволи декIар-декIарти кооперативти абхьахъес ихтияр бедибсири. Илаб пайла бегIти чумал адам-кумхакьяна цалабикили, цагъунти арцла харжаначил кооператив абхьес вягIда бирусири, илкьяйдали хайрира буртIесли.

Нушала анцIбукьлизиб авал адам лебтири кооператив абхьибти. Илдазивад цалицун сарри гIягIниси техника ва цархIилтира кооператив акIахъес хIяжатти ваяхIлис арц харждарибти. Илини кооперативлис тракторти, автомашинаби ва цархIилтира секIал асиб. ХIейгеси биалра, камси заманацун сабри кооператив бузули калунси. Чумал дусла гIергъи кооператив тIутIубиуб, ва ил кьяпIбарес чебуркъуб. ИлхIели кIел кооперативла кумхакьянаби – мурул-хьунуй хIяялизибад бухъи, байхъайчибра имцIали кооперативла лебдеш чус арбухиб, хIятта кооператив ибхьухIели, илдани цалра къуруш харжхIебарибси биалра. Ишаб халаси суал алкIули саби, илдани бархьси барилив, цархIилван буралли, илдани бигIунси мас хIялал бирусив?

– Суал бучIухIели, ишар дахъал хIергъести секIал лер: кооператив алкIахъухIели сегъунти вягIдурти дигьунтирил, сегъунти шуртIри хIясибли абхьибсирил, кооперативлизи каберхуртани илди дузахъули калунтирил ва цархIилтира.

Сен-биалра, чедиб бурили кьяйда, чула шайзибад селра харжхIебарибкъира, техника чула арилизи буцили биалли, илди чус хIялалтили детхIерни якьинни саби. ШаригIят хIясибли, илгъуна барес асубируси ахIен. СенахIенну бегI гьалаб илдани кооператив алкIахъухIели, бутIацугдешличила белкIла ахIи, мухIлила вягIда барили биаллира, ил марси саби, шаригIят хIясибли, ил булъэс асухIебирар. Ишаб илгъуна мягIнала хIядисра гьанбушес вирар: «Бусурман адамлис цархIил бусурман адамла хIи, мас-мулк ва яхI-ламус хIярамдарибти сари».