Дудешла диги
Ца давлачебтала хъалибарглизивадси жагьси урши белчIуди таманбарили, диплом касес хIядурикIулри.
Чумал баз ил жагаси, выставкаличи кабихьибси спортивный машиналичи хIерикIес вашулри. Дудешла ил сунес савгъатбарес ахъри лебни балули, илини ил гьалабал тиладибарибсири. Диплом кайсуси бархIи гъамбикIуцад, ил хIерлири дудешли машина аснила лишанничи. Ахирра, дудешли ил сунела кабинетлизи живариб, багьудичевси, духуси уршиличи пахрубирниличила ва ил сунес цIакьли дигахъниличила буриб. Дудешли илис савгъатла тIакьа гьабуциб. Тамашавиубси уршили ил абхьибхIели, илаб жагаси Кьуръан чебаиб.
«ХIелагъуна лебдешличил хIуни наб Кьуръан савгъатбирулрив?», - или хямкдарили унзара, Кьуръан столличиб батурли, дуравхъун. ГьимукIили, ил дудешлизи гIур гъайхIевкIи. Чумал дусла гIергъи, хIянчиличив ахъси даражаличи ваиб. Жагаси хъали асиб ва хъалибарг акIахъуб. Цагьачам, илис диплом касибхIейчивад чехIеибси, ухънакаибси дудеш гьаникили, иличи укьес кьасбариб. Ил манзил иличи дудеш вебкIниличила балахъуси телеграмма бакIиб. Дудешли лебил сунела мас-мулк, лебдеш уршилис батурлири. Дудешла хъули ацIибхIели, илала уркIи пашмандешли бицIиб. Илини столличирти кагъурти хIердариб. Илди-ургаб Кьуръанра сунени батурси кьяйда лебалри. Ил гьар секIал гьандикили висули, Кьуръан сабирхъесииб. ИлхIели илала тIакьализибси кисализибад машинала умхьу кабикиб.
Иличиб выставкала уличилси кагъарра лебри, диплом касибси бархIира, «Арц бедибси саби» …ибси белкIра. Илини гьар секIал аргъиб… ИмцIатала хатIа саби бегIтачил гъайбикIухIели, сабурхIебирни ва цали цала хIергъни. Нушани ЧевяхIси Аллагьла ﷻ лигIматуни чехIедиули, илдала мякьларад аркьулра, чIянкIли илди нушаб дигуси тяхIярли нушачи хIедашули или. ЧевяхIсини биалли, гьар-журала лигIматуни сунес дигуси тяхIярли сари нушачи дурхьути.
