Шел секIал, чула кири хIяжлайчи абиркуси
Шел секIал, чула кири хIяжлайчи абиркуси
ХIяжлайчи кири абиркуси саби или ибхIели, бахъли иргъу ил баралли, хIяжлизира хIявкьялра гIямалбируси саби или.
Ил халаси хатIа саби, илдани хIяжла мер бурцуси ахIен, амма Аллагьли ﷻ илди камти баркьудлуми илцадра дурхъадарили сари, илди дарнилис хIяж барибсилисгъуна кири бедлугули саби. ХIяж биалли, арцлара, арадешлара ахъри лебси гьарил бусурмайчи хъарси фарз саби.
1- Умуси кьас
Кьиямала бархIи адамлис сунела баркьудлуми делкIунси кIапIи бедлуга. Илини илар хIяжра, барибси мижитлара, бутIибси садакьалара кири бургу. Ил тамашавиубли Аллагьличи ﷻ дугьавилзан: «Я дила Аллагь ﷻ, нуни ишди хIедаррагу, ишди сен делкIунти иша?». Аллагьли ﷻ илизи иру, Нуни баласра хIуни илди хIедарни, амма хIела умуси, Ну багьанданси кьас лебри хIела ахъри биалли, хIяж барес, мижитуни дирес, мискинтас кумеквикIес, илдас садакьа бедлугес. Нунира хIед илди дарибтиван делкIунра, илди дарибтала кирира лугулира.
2 - ЖамагIятла дехIибайчи укьес гьалар хъулир дазала дарни
Идбаг викIули сай: «Хъулир дарили дазалара жамагIятла дехIибайчи чи укьяллира, итис хIяж барибсилисгъуна кири биур».
3 - Суннатла дехIибала
Идбаг викIули сай: «Чи савлила дехIибайчи мижитла укьяллира, дехIибала дарили гIергъи, бархIи ахъбиайчи зикрума виркьули калалли, итис хIяж барибсигъуна кири биур, гIур кIел ракагIятла суннатла дехIибала дараллира, итис гIумра барибсилагъуна кири лукIа».
4 - ГIилму касес яра цархIилтази багьахъес мижитла укьни
Идбаг викIар: «ГIилму касес яра цархIилтази гIилму багьахъес мижитла вякьунсилис хIяж барибсилисгъуна кири лукIа».
5 - БегIтала разидеш
Идбагла ца асхIяб иличи вакIили викIар: «Я Аллагьла Расул, наб Аллагьла ﷻ гьунчив узес дигулра, амма вирули ахIенра».
Идбагли илизи хьарбаиб илала бегIти лебал. Илини буриб неш лер или.
ИлхIели Идбаг викIар: «Илис секьяйдали вирадлира ил разирикахъес къайгъибара, илис вирусигъуна къуллукъбара. Марлира, хIед хIяж барибсилисгъуна кири лукIа».
