Хьунул адамтала мажлис
«ИшхIелила жамигIятлизиб хьунул адамла кьадри» бикIуси Дагъистанна Муфтиятла ва ДР-ла миллатла политикала ва динанала къуллукъунала шайчибси Министерствола сипталичил балбуц бетерхур. Иличир ишбархIила манзил жамигIятла гIямрулизи хьунул адамтани кабирхьуси пайличила масъулти ахъдуциб.
Илизир бутIакьяндеш дариб Дагъистанна муфтийла насихIятчи, журналист Айна ХIямзатовани, политикала гIилмуртала доктор, ДР-ла бекIла шайчирси биштIатала ихтиюрти далтахъуси вакил Марина Ежовани, ДР-ла Халкьла Собраниела председательла заместитель Елена Ельниковани, миллатла политикала ва динанала къуллукъунала шайчибчи Министерствола отделла начальник Хасайбат Валиевани, хьунул адамтала багьудила «Гьидаят» центрла руководитель Загьра ИсмягIиловани, писательтала Союзла Дагъистанна отделениела председатель, журналист, публицист Миясат Муслимовани, психолог-консультант Наида ГIялиевани ва цархIилтанира.
ХIердарибти масъулти-ургар лерри нешдешла, хъулиб зулму бирниличила, хьунул адамла хIянчиличила, хъа духIнарти чеблумачила, рурсбас бяркъ бедлугниличила, нушала регионнизирти хъалибаргунала ва палтар-кьяшла хасдешуначилара дархли.
Ил балбуцли жура-журала санигIятунала ва динанала хьунул адамти цалабяхъиб. БекIлибиубси пикри сабри – хьунул адамтани жамигIятла гIямрулизи кабирхьуси буресагарли халаси пай, сенахIенну илдани саби биштIахIейчибад бехIбихьили, чеалкIуси наслулис бяркъ бедлугуси. Ил багьандан нушала хъалибаргуни ва нушала дурхIни мяхIкамбарес, дурхIнази динна тяхIяр-кьяйда ва хъалибаргла дурхъадешуни дагьахъес чебиркур. Динна кьанунти хIясибли биалли, дурхIнани бегIтала ибси бирес гIягIниси саби. Ислам диннизиб нушаб Кьудратла ВегIли хьунул адамла даража дебали ахъли чебиахъули саби ва иличил дарх илала жавабкардешра дебали ахъти сари. БиштIатас бархьси бяркъ бедес, хъалибарглис ва муруйс гIягIниси тяхIярла къуллукъ гIеббаахъес, илхIелира хIянчиличи рашесра бажардириркули сари ишбархIи хьунул адам. ИшбархIила бархибси дунъяличиб хьунул адамтас бегIлара дурхъаси хъалибарг ва дурхIни пикрила дураб кахIевлахъес багьандан, илдас гьатIира дебали чебетаибтили биэс чевкъули саби. Гьарилти гIяхIти баркьудлумазир ЧевяхIсили гIердуцили, бархьси гьунчирад дашабая. Амин!
