Редакциялизи кагъар
Редакциялизи кагъар
Вирусив адамла гьалабси бунагь чебахъес, сунези мукIурхIекIили, илала шайчибад барибси садакьаличибли?
ВегIли барибси бунагьличи, хатIаличи пашманвиъни ва тавбадарни халбируси саби чIянкIли гIергъити шуртIри дузахъаллицун:
- Бунагь хIебиранвиалли;
- Барибсиличи пашманвиалли;
- Бунагьличи гIур чархIелхъес чIумали кьасбаралли.
Илди шуртIри дузахъни баибси саби тавба кьабулдарахъес багьандан, эгер бунагь цархIилти адамтала ихтиюрти дулъниличил барххIебаси биалли. Рахли бунагь цархIилти адамтала ихтиюрти дулъниличил бархбаси биалли, авъибил шартI имцIабируси саби – вегIли барибси баркьудилис жавабкардеш дихни.
Мисаллис, адамли цархIилли-чила шутIни-къунби дурили, бугьтан чебушили виалли, илини илизивад чевверхни тиладибарес ва сунела гъайлизивад гIелумизес гIягIниси саби.
Рахли адамли цархIилла мас яра се-биалра бигIи, бунагь барили виалли, илис ца тавбацун баибси ахIен. Илини илала бигIунси секIал кали биалли, чараагарли чарбарес чебси саби. ЦархIилван биалли, илини илгъуна секIал чарбарили, яра илала багьала кьадар бедили, чебахъес гIягIниси саби.
Ил секIал бигIунси адамли вирули виалли, къалабаси тяхIярли чарбарес чебси саби. Вирули хIейалли, ил сунела ахъри бакIайчи тIашизес вирар, ва ахъри бакIибмад барибси зарал чебахъес гIягIнибиркур, илала багьа бедес имкан дакIубиубмад, яра зараллиу викибсилизибад чевверхни тиладибарес.
Лерилра хIябалра шартIра духIнадуцили, уркIи-уркIилавад пашманиубли, тавбадаралли, ил гьарли-марсилизи халбируси саби, адамли бигIунси чебахъили хIейаллира. Амма секIал чарбарес гIелумизнила бунагь убисуси ахIен бигIунси секIал чарбарайчи.
БигIунси секIал чарбирухIели, сунени бигIниличила адамлизи хIебураллира бууси саби, ва чарбируси секIал – илала бигIунси секIал, яра иличи цугси секIал биъниличилара.
