Мижит балкьаахъур
КIишала убил шила ЦIурмигIянна дублаб, гьалабла замана къала бируси мерлаб, гъятIбиибси халаси ахIенси юрт бири. Гьанбиркули саби, диштIахIели зилантачил дарх хIязтадиркьес ила дашули. Ит замана илар колхозла складуни дири. Хъубзурала гIягIниахълумира кадирхьули дири ила. ХIеруди камбиубхIели, ил гъятIбулхъличи шурбухъун. Шила кьади ГIялини бурни хIясибли, ил мижитла юрт барибхIейчирад кIидаршлим авцIали дус дикили сари. Лацла бяхIлизибси тарихла белкIли илис бикьридеш дирули сари. Замунти дарсдиубхIели, законтира дарсдариб.
– Ца бархIи, – бурули сай Ибрагьимла Кьурбай, – Муса вакIили, дудешлизи аргъахъиб мижитуни дузахъес дигутас ихтиюрти дедили сарину, Ибрагьим, валкьаи или.
Ибрагьим итхIели гIярабла гIилму гIяхIил дяркъуртазивадлири. ХIялалдиаб чус, цауркIли дурабухъунти цIурмигIянтли ил мижит бирнила хIянчи ахирличи дикахъиб.
Дин дигути шантас гIяхIси савгъат бетаур. КIишала шилизиб мижит дакIубухъун. Ила башутира имцIабикIулри. Илкьяйдали январьла 26-личиб мижит къулайси даражаличи бушес пикрибариб. Ванали биахъес багьандан чIябар барсбаресра хIяжатлири.
Телефоннизибад жибарили, убил шила шантала кьукьяра бакIиб.
Мусала МяхIяммадли хIянчи дехIдихьиб. Гьаланачи собраниера барили, шантазира аргъахъибсири. Шантала уржибдешличибли хIянчилис кумек гIеббиахъухIели ва халкьли бируси садакьа имцIабикIухIели, Рабазан баз бехIбихьайчи духIнарти хIянчи тамандарес имканбакIиб.
ИшхIелла тIалабуначи балбикахъили мижит балкьаахъурли саби. Баркалла багьахъес дигулра лерил хIянчи дарайчи сунела хъулив кьяйдали вяшикIуси ва сунела замана ахIерахIебарибси, бамсри хIебалуси Мусала МяхIяммадлис.
Ну вирхулра гьаннала гIергъира МяхIяммадли мижитлис къуллукъбирниличи.
ГIурра баркалла багьахъес дигулра илди хIянчи ахирличи дикахъес камси биалра кумекбарибтас, садакьа барибтас.
Аллагьли ﷻ кьабулдараб лебталалра садакьаби. Гьанбушес дигулра Кьасумла Багьаутдинна ура. Сунела харжаначил, замана ахIерахIебарили, мижитлар дахъал хIянчи дариб.
ВецIну шура дусличирра имцIали мижитлис къуллукъбируси ил бузахъуси МяхIяммадрасуллисра халкь мурталра баркалла бикIули саби.
Шилизив хIерирули хIейалра, халаси кумек гIеббаахъиб Рабаданна МяхIяммадлира, уми гьандушес дигулра Мустапала, ГIябдурашидла, Рабаданна, Мусалавла ХIяжила. ИмцIаси чула замана мижитлаб беркIибтасра шантани баркалла балахъули саби.
ХIянчи ахирличи дикнила разидешлис мижитлаб мавлидра дураберкIиб. Мусала МяхIяммадла хъулиб беркала хIядурбариб. Садакьа барибси МяхIяммадла ГIяхIмадлис баркаллара багьахъур.
Дарести гIурра кали сари, хъалч барсбаресра пикри леб. Илгъуна хIянчи барахъесра Аллагьли ﷻ кумекбараб.
