Дагъистанна муфтий шайх ГIяхIмад-апандила мубарак
«Ассаламу гIялайкум ва ряхIматуллагьи ва баракатугьу!
АхIерти узби ва рузби! УркIи-уркIиларад хIуша чесабиуси дурхъаси дуббуцарла – Хала БархIила байрамличил мубаракдирулрая. Ил баракатла бархIи лебилра бусурмантани ЧевяхIсилис баркалла балахъули саби дубдурцес, имцIали дулгес, кумек хIяжатсилис ил гIеббаахъес имкан гибнилис. Ил базла бухIнаб лебил дунъяла бусурманти дуббуцили, гьар секIайзибад мяхIкамдеш бируси саби, дунъя акIахъубсилис мукIурли, Илала гьарил баркьуди таманбирули ва Илала ахирагарси уркIецIиличи умутбирхьули.
Гьар дус бусурмантани ил базлизиб узидешла бархбасуни чIумадирули, хасси сахаватдеш, уркIецIи-ряхIму дакIудирули, мискинтас ва ахъриагартас кумекбирули, ифтарти дурадуркIутири. Илдачиб гьарил дубватес вирусири ва динна вягIзабачиб рухIласи давла сархес имканбикIахъули. Кьабулбараб гьарил хIушала гIяхIси баркьуди, ЧевяхIсини ахирагарти лигIматуни савгъатдараб.
Дигеси саби илдигъунти далдуцуначиб жамигIятла гьар журала вакилтани бутIакьяндеш дирни, динничи ва миллатличи хIерхIеили, муниципалитетунала бургачибад бехIбихьили, гIядатла адамтачи бикайчи, илдигъунти мажлисунани халкь цабирахъу, адамти-ургарти узидешла бархбасуни чIумадирахъу, патриотизм ва вегIла ВатIайчи диги имцIадирахъу.
Кьудратла ВегIлис ахирагарси шукру бирулра, нушаб илди баракатла бурхIни деркIахъес имкан гибнилис ва тиладибирулра гIергъити дусмазирра нуша илгъуна уркIецIилизирад хIедухъахъес.
ЧевяхIси нушала бунагьуначивад чевверхаб, нушала дуббуцари, садакьа, закат ва лерилра иш базлизир дарибти гIяхIти баркьудлуми кьабулдараб ва шабагъатладараб.
Рамазан базлизир сархибти гIяхIти хIял-тIабигIятла ва баркьудлумала мах нушачил мурталра калаб, нушаб чузирад дерцес бикибти лерилра бунагькарти ва лайикьагарти гьар секIал нушачи чармадухъаб!
Ахърила ВегI Аллагьлизи ﷻ тиладибирулра иш дурхъаси баз сабабли биахъубли нуша балагь-мусибатуназирад, питнабазирад, дургъбазирад мяхIкамдарили, бусягIят даршудеш, гIяхIдеш, бархьдеш багьандан бургъутас чIумадеш ва сабур гахъес. Амин!»
