ХIушани дирудаяв ца дугила бухIнаб лебил Кьуръан белчIес?
Идбагли ﷺ сунела асхIябтази хьарбаиб: «ХIушани ца дугила бухIнаб Кьуръа хIябал бутIала ца бутIа белчIес хIедирудаяв?». АсхIябти тамашабиубли, секьяйдали вирусив или Идбаглизи ﷺ хьарбаиб. Идбаг ﷺ викIар: «БелчIенная сура «Ихляс» (кьулгьу), марлира цайна белчIунси сура «Ихляс», Кьуръа хIябал бутIала ца бутIа белчIниличи цугбиркур».
ДекIарти хIядисуназибра буруливан, хIяйна сура «Ихляс» белчIалли, лебил Кьуръан белчIунсиличи абиркур.
Марлира, сура «Ихлясла» дурхъадешличила лукIули дахъал жузи делкIес вирар. Нушанира къантIли илала кириличила баянбарес къайгъибирехIе.
Анас ибн Маликли бурули сай, ца адам Идбагличи ﷺ дугьавизурли, сунес сура «Ихляс» дебали дигниличила багьахъур или. Идбагра ﷺ илизи викIар: «ХIела иличибси дигили хIу Алжунтази аркури».
Убай ибн КагIбли бурибси хIядислизив Идбаг ﷺ викIули сай: «Гьачам сура «Ихляс» белчIунсилис Аллагьли ﷻ ужра бедлуга, лебил Сунечи, Сунела малаикуначи, Сунела китабуначи, Сунела идбагуначи иман бухибтас бедлугусицад. «Ихляс» белчIунси адамлис кири биур гъазаватлизиб бебкIибти шагьидуналайчи абикибси». Ил хIядис «Ат-Тафсир аль-кабир» бикIуси жузлизиб бурули саби.
Абу Гьурайрачибадли бакIибси хIядислизиб леб: «УркIи-уркIилабад «Ихляс» белчIунси адамличи Аллагьли ﷻ Жагьаннабла цIа гъамхIебирахъу.
МугIяз бин Джабаллира, Анас бин Маликлира бурибси хIядислизиб леб: «Чили 11-йна сура «Ихляс» белчIаллира, Аллагьли ﷻ сунес Алжанализиб кIялгIя биру».
Абу Гьурайранира, СагIид бин МусайгIяйблира хIядис бурули саби:
«Сура Ихляс чили 11-йна белчIаллира Аллагьли ﷻ сунес Алжанализиб кIялгIя биру, чили 20 -йна белчIаллира итис кIел кIялгIя диру, 30 -йна чили белчIаллира итис хIябал кIялгIя диру». ИлхIели ГIумар бин ХатIабли тIамадариб: «Я Аллагьла Расул, Аллагьла ﷻ уличибли хъя бирулира, Алжунтазирти нушала кIялгIни нушани чуйнара имцIадирехIе».
Идбагра ﷺ илхIели викIар: «Марлира Аллагьла ﷻ уркIецIилис дазу агарси саби».
«РухIуль баян» бикIуси жузлизиб, ГIяли асхIябла гъай дурули сари. ГIяли ибн Аби ТIалиб викIар: «Савлила дехIбайс гIергъи 11-йна «Ихляс» чили белчIаллира, ит бархIилизиб итини бунагь хIебиру, сунези бунагь барахъес сецад халаси хIянчи шайтай бараллира».
Ат-ТIабаринира, Абу Гьурайранира хIядис бурули саби: «Сура «Ихляс» 12-йна чили белчIаллира, итини лебил Кьуръан авна белчIунсиличи цугбиркур, ит бархIилизирра сунела хIял-тIабигIят дукьхIедуи калалли, ит бегIлара разити адамтазивадли ветарар». «Аль-хазаин» бикIуси жузла 152 бяхIлизиб леб, Ибн Насрли Анас ибн Маликличибад хIядис бурули сай: «50-йна сура «Ихляс» чили белчIаллира, Аллагьли ﷻ сунела 50 дусла бунагьуни умудиру».
Ат-ТIабарини Джабир бин ГIябдуллагьличибад бурибси
хIядислизиб леб: «Бусурман адамли гьар бархIи 50-йна сура «Ихляс» бучIалли, Кьиямала бархIи сунела хIябла чедиб тIамала бикьу:
«Айзи, Аллагь ﷻ дурхъавиран лагъ! УхIнаухъен Алжанализи!».
Идбаг ﷺ викIар: «100-на сура «Ихляс» белчIунси адамла Аллагьли ﷻ 50 дусла бунагьуни умудиру, авал журала бунагьуни калайчи. Илди сари халати бунагьуни: адам кавшнила, зулмули мас бучнила, зинала, держли ужнила».
Ат-Тирмизини анас бин Маликличибад бурибси хIядислизиб
леб: «200-на сура «Ихляс» чили белчIаллира, Аллагьли ﷻ сунес
1500 гIяхIти гIямал дарнила ужра бедлуга, сунела жузлизирадра 50 дусла бунагьуни урису сунечиб адамтала хIекьлизибси чебла лебли хIебиалли.
Усес кайхьунхIели, кайхьи балуй шайчи, чили 100-на сура «Ихляс белчIаллира», Кьиямала бархIи сунези Аллагьли ﷻ иру: «Я Дила лагъ! Балуй шайчивадли Алжанализи ухIнаухъен!». Нушала Идбаг ﷺ мурталра нушачила кьакьавикIули вири. Сай акIубхIели цаэсти гъайра, убкIухIели дегIлара гIергъити гъайра «дила уммат» сарри. Нушачила кьакьахIейкуси цалра бархIи лебси ахIенри. Амма хIядисуназиб бурни хIясибли, Идбаг ﷺ викIули сай: «Ну дила умматличи кьакьавикуси заманализив набчи ЖабрагIил малаик вакIиб, илини набчи сура «Ихляс» хьурабариб. ИлхIели нуни багьурра, Аллагьли ﷻ дила умматла ил бучIути муъминти гIязабхIебуркIу».
