Гьарахъси архIя

Гьар дус миллионти адамтани дурхъати мераначи хIяж дурабуркIуси саби. Макка-Мадинала мер-муса чедаэс дигути ва бусурман динна шуэсил рукну – хIяж дураберкIес дигути адамти дусличи-дус имцIабикIули саби. Жяв замунтазиб ила бахъалгъунти адамти хьурали башутири. ИшбархIила заманара илдигъунти айхъули саби.

Индиялизивадси бусурман Шихаб Чоттур ил тяхIярли Маккализи ваиб. Илини хьурали 8640 километр ахъиб. Керала штатлизибси туке вегIли чуйнара хабурти делчIунтири, секьяйда хIяжликьянаби хьурали дурхъати мераначи баибал, ва илини илдачибад гIибрат касес кьасбариб.

Сунела архIя илини ириъла июнь базличиб бехIбихьибсири. Саудунала ГIярабиялизи аркьухIели Шихаб Чоттурли Пакистан, Иран, Иракь ва Кувейт ахъибтири. Илала архIя 12 базра 5 бархIира бухъянбитIун.

«Гьарил илгъуна гIяхIси пикрила вегI сунела мурадличи ваэс вируси сай», - викIар хIяжликьяна.

Шихабли бурни хIясибли, илала архIя гьамадси ахIенри. Пакистанна дазуличив виза агархIели ил тIашаибсири. ИлхIели илис хIяжатбикиб улкала консульстволизи вякьи ил сасес. Гьунчив ил дахъал къияндешуначи вяхIягиб. Илди-ургар илини гьандушиб дугIла мицIираг ва Ираннизибси бугIярси аргъ.

Саудунала ГIярабиялизи ветаибхIели, Чоттур гьаланачи Мадинализи ваиб, гIур биалли Маккализи. Илди шагьурти-ургабси 440 километрла бухъяндешра илини хьурали ахъибси саби. Ил ахъес багьандан 9 бархIи ардякьун.

ХIяж барес Шихаб Чоттурли кьасбарили сай неш Зайнабличил барх. Ил Индиялизирад Маккализи самолетличир ляркьуси сари.

Кьабулбараб ЧевяхIси Аллагьли ﷻ гьарилла хIяж! Амин.